Florin karibense a gana premio Regional Best New Banknote Series 2025

Florin karibense a gana premio
Regional Best New Banknote Series 2025

WILLEMSTAD/PHILIPSBURG—E serie di biyete di florin karibense (Cg) a sali ganadó di e premio
Regional Best New Banknote Series 2025 na e konferensia di High Security Printing (HSP) Latin America, na Rio de Janeiro. E premio akí ta un rekonosementu pa biyete i serie di biyete ku demostrá ekselensia den arte visual, kombiná ku un nivel haltu di sofistikashon teknológiko i karakterístika di siguridat. Fuera di esei, e biyetenan mester reflehá herensia kultural di e pais emisor. Tambe a wak te kon leu nan diseño en general i e símbolonan usá ta relevante pa e pais.
E demas ganadónan ta Bermuda Monetary Authority, ku a bai ku e premio di ‘mihó biyete nobo’ pa nan biyetenan di 1 i 2 dòler di Bermuda, emití resientemente, i Banco de Guatemala ku ‘mihó biyete konmemorativo nobo’ pa nan biyete di 1 quetzal emití na okashon di e di 100 aniversario di e moneda guatemalteko. E aña akí, a introdusí un premio nobo pa ‘mihó proyekto medioambiental’, ku a keda otorgá na Papierfabrik Louisenthal GmbH.
Entrega di premio a tuma lugá riba e famoso seru Pão de Açucar. Den su palabranan di
gradisimentu na e seremonia di entrega, Raquel Lo-Fo-Wong, direktora di e filial di CBCS na Sint Maarten, a ekspresá ku e premio Regional Best New Banknote Series 2025 ta un bunita rekonosementu pa tur e añanan di trabou duru ku a bin resultá den e serie di biyete asina spesial akí.
HSP Latin America ta un konferensia anual organisá pa Reconnaissance,1 kaminda representante di vários gobièrnu, banko sentral, diseñadó i fabrikante ta topa pa presentá i trata e teknologianan di mas moderno riba tereno di imprenta i karakterístika di outentisidat pa biyete, ID i pasport. Na e konferensia di tres dia, CBCS, den persona di Nancy van der Wal, Hefe di Corporate Communications, a duna un presentashon riba e importansia di komunikashon i merkadeo adekuá i konstante pa bo por logra haña e sosten nesesario di komunidat pa introdukshon di un moneda nobo. I den e kuadro ei, por sierto, CBCS por a konta ku un aporte importante di parti di e suministradónan Crane Currency i Royal Canadian Mint.

1 Reconnaissance International ta e organisadónan di e serie di konferensia High Security Printing (HSP). E
konferensianan akí ta un fuente importante di informashon na nivel internashonal riba tereno di valuta,
holografia i protekshon di dokumento. Reconnaissance International ta ofresé informashon riba tereno di
merkado, strategia i teknologia via vários publikashon i evento. Ademas, nan ta organisá e konferensianan
HSP Asia i HSP Latin America.

E premio Regional Best New Banknote Series 2025 ta un bunita rekonosementu en bèrdat, no
solamente pa CBCS sino, mas ainda, pa komunidat di Sint Maarten i di Kòrsou.
Willemstad, 18 di yüni 2025
CENTRALE BANK VAN CURAÇAO EN SINT MAARTEN