HUNGADÓNAN DI MLB ELITE CURAÇAO TA BRIA NA VERO BEACH 

HUNGADÓNAN DI MLB ELITE CURAÇAO TA BRIA NA VERO BEACH 

WILLEMSTAD – E hóben peloteronan di MLB Elite Curaçao a bolbe di un eksperensia úniko for di e torneo Breakthrough Series na Vero Beach, Florida. Durante un siman intensivo, e hungadónan no solamente a representá Kòrsou ku orguyo, pero tambe a demostrá un desaroyo i kresementu remarkabel den nan abilidatnan di beisbòl.

E torneo tabatin kompetensia intensivo entre e16 ekiponan di rònt Merka i Puerto Rico, di kual e ekipo di MLB International a keda formá pa peloteronan di Brasil i Kòrsou. A pesar di nervio inisial i e reto di mesklá hungadó di dos programa di desaroyo di beisbòl diferente e ekipo a akoplá gradualmente i a logra finalisá e torneo ku un rekord di dos gana i dos perdi. E ekipo a demostrá resiliensia i a bin bèk pa gana nan dos último partidonan.

Un punto kulminante pa e hungadónan tabata e guia eksepshonal ku a keda duná pa e staf profeshonal di coach forma pa eks peloteronan di Major League Baseball, konsistiendo di infield coach David Eckstein—dos bes kampion di World Series i MVP di Series, coach di pitcheo Roger McDowell—kampion di World Series na 1986 ku NY Mets, i outfield coach Jeff Conine—dos bes kampion di World Series ku Miami Marlins i semper rekordá komo “Mr. Marlin.” E instrukshon profeshonal, huntu ku apoyo di e coachnan di Brasil, Kòrsou i Mexico a brinda e hungadónan training i tepnan balioso durante e siman.

E weganan a tuma lugá na e kompleho moderno i grandi di Jackie Robinson, kaminda e ekipo tabatin e privilegio pa hunga dos partído den Hollman Stadium ku ta e stadion prinsipal. Varios scout di ekiponan di MLB tabata presente pa wak e weganan i asina wak nos peloteronan den akshon. Notabel tabata ku un scout di St. Louis Cardinals, despues di sigui un di e hungadónan di Brasil for di e aña anterior, na final di e siman a firma e atleta na un kontrato profeshonal. E akto aki a sirbí komo inspirashon pa nos hungadónan, i mantene nan soño bibu di firma un kontrato profesional òf haña un beka di studio na un highschool of universidat na Merka den futuro serkano.

Logronan individual tambe a keda selebrá bou di e hungaónan di Kòrsou ora ku Chey-niël Delanoy a keda nombrá komo e mihó bateadó di ekipo i Sebastian Ramirez Russo a keda rekonosé komo e miho pitcher despues di logra e promé viktoria den historia di ekipo di MLB International. Manager Rudy van Heydoorn i e staf di entrenador di MLB Curaçao ta orguyoso di e logronan di e peloteronan.

Keda pendiente paso MLB ta bai organisá un tryout grandi na Kòrsou na luna di ougùstùs próksimo, ofresiendo asina potensial hungadónan e oportunidad pa uni nan mes na e programa di MLB Elite Curaçao. Curaçao Baseball Development Foundation, partner di MLB aki na Kòrsou, i Curaçao Tourist Board ku ta sostené e projekto di desaroyo di baseball lokal ta felisitá un bes mas nos hóbennan ku a destaka na Merka.