Festival del Caribe 2025
Enseñansa, Siensia, Kultura & Deporte
Festival del Caribe 2025
Publiká riba 27 Yüni 2025
Kòrsou ta Invitado di Honor na e Festival del Caribe 2025 na Santiago de Cuba
Willemstad – Ministerio di Enseñansa, Siensia, Kultura i Deporte (ESKD) ta informá komunidat di Kòrsou tokante e partisipashon ofisial di Kòrsou na e di 44 edishon di e Festival del Caribe. Tambe konosí komo e Festival del Fuego, ku ta tuma lugá di 3 pa 9 di yüli 2025 na Santiago de Cuba.
E aña aki e festival ta dediká na Kòrsou. E invitashon aki ta nifiká ku e identidat kultural, historia i ekspreshon artístiko di Kòrsou ta sentral durante un di e festival kultural di mas grandi den Karibe. E Festival del Caribe ta un evento anual ku ta enfoká riba selebrashon kultural, arte popular i spiritualidat afrokaribense i indígena. E eskoho di Kòrsou komo invitado di honor ta enfatisá e konekshon históriko, kultural i sosial entre Kòrsou i Cuba. Tur dos nashon ta kompartí elementonan di un pasado kolonial komun i lasonan kultural.
E delegashon ofisial di Kòrsou ta konsistí di mas di 140 partisipante, inkluyendo artista, músiko, akadémiko, grupo di baile, representante di sektor di kulinario i turistanan. E delegashon ta ser kordiná pa e Ministerio di ESKD i ta bou di guia di Aisha Gijsbertha-Leer (Asesor Spesialista den Kultura) i Lisette Jansen (Asesor Konsulente di Kultura).
Programa Artístiko i Kontenido:
E delegashon ta ser liderá pa Richenel Ansano, investigadó i eskritor kultural, ku ta duna lès i ta partisipá na diskushonnan. Giovanni Abath, artista visual, ta presentá un eksibishon den kolaborashon ku e artista kubano Alberto Lescay. Kris Kirindongo, representando Vital Art, ta duna un presentashon kulinario kaminda elementonan di e kushina di Kòrsou i Cuba ta bin huntu. Ralph Winedt ta mustra un selekshon di pelíkula kòrtiku tokante herensia, identidat i sosiedat. Richailine Elisa ta presentá un obra teatral. E show prinsipal, bou di direkshon di Dennis Puriel, ta uni artistanan di Kòrsou i Cuba den un produkshon musikal i visual komun.
Músika, Baile i Tayer:
E grupo musikal Tumao Cubacao, bou di direkshon di Igor Rivas, ta kombiná e estilonan musikal di Kòrsou i Cuba den presentashonnan bibu. Ademas, e siguiente gruponan ta partisipá: Konjemba, Dundula, Kristal, Nos Antias i Mardie Grass, ku ta representá diferente forma di baile i músika. Heinrich “Richie.R” Pieter ta duna presentashon i tayer di kanto. Sorandy Sint Jacobs ta duna un tayer tokante kon pa traha instrumentonan musikal tradishonal. Alejandra Cijntje i Morgaine Parris ta guia tayernan di arte visual pa hóben.
Ekshibishon ‘Kargadó di Kultura’ na ICAP:
E aña aki, e Kas di Kòrsou ta establesé na e Instituto Cubano de Amistad con los Pueblos (ICAP). Aki ta presentá e eksibishon ‘Kargadó di Kultura’: un homenahe na personanan ku a hunga un ròl importante den e desaroyo i transferensia di kultura di Kòrsou. E ekshibishon ta destaká entre otro: Roland “Ròi” Colastica, Rose Mary Allen, Shulaika ‘Su’ Girigorie†, Joceline Clemencia†, Shon Cola, Ced Ride† i otronan.
E ekshibishon ta ofresé bishitante un bista den e trabou i kontribushon di e individuonan aki i ta sirbi komo un plataforma di konosementu i un momentu di apresio. E partisipashon di Kòrsou na e Festival del Caribe 2025 ta ofresé e oportunidat pa sigui fortalesé kolaborashon kultural ku Cuba. Pa medio di presentashon artístiko, interkambio di konosementu, esaki ta kontribuí na e posishon mas stabil di Kòrsou den e region.
E Ministerio di ESKD ta deseá tur partisipante i esnan envolví hopi éksito durante Festival del Caribe 2025 i ta spera un representashon inspiradó i signifikante di Kòrsou na Cuba. Pa mas informashon òf kontakto: Ministerio di OWCS – Aisha Gijsbertha-Leer E-mail: aisha.leer@owcs.gov.cw òf na whatssApp: +5999 516 6973.
—