Parlamento a apbrobá e “Initiatiefontwerplandsverordening tot wijziging van de Landsverordening minimumlonen (Zittingsjaar 2022-2023-207)”.
Parlamento di Kòrsou
Parlamento a apbrobá e “Initiatiefontwerplandsverordening tot wijziging van de Landsverordening minimumlonen (Zittingsjaar 2022-2023-207)”.
Djaweps 3 di yüli 2025, Parlamento a bin huntu den un reunion Públiko pa trata e “Initiatiefontwerplandsverordening tot wijziging van de Landsverordening minimumlonen (Zittingsjaar 2022-2023-207)”. E reunion a kuminsá ku un presentashon di sra. Giselle Mc William di frakshon di MAN-PIN, komo inisiadó di e proyekto di lei, ku ta enserá adaptashon di suèldu mínimo pa hóbennan di 18 te ku 20 aña.
Seguidamente a habri e promé tanda, pa duna Miembronan di Parlamento e oportunidat di hasi pregunta relashoná ku e tópiko. Na final di e promé tanda, Presidente di Parlamento, sr. Fergino Brownbill a skòrs e reunion pa duna sra. Mc William e oportunidat di formulá su kontestanan.
Despues Parlamento a regresá sala di Parlamento pa e kontestanan i e di dos tanda di pregunta. Sra. Giselle Mc William a pidi espasio di 20 minüt i a kontestanan e preguntanan di dos tanda tambe.
Presidente di Parlamento a pone e proyekto di lei na votashon, ku Parlamento a aprobá ku votonan general.
Relashoná ku e proyekto aki, Parlamento a vota riba un moshon entregá pa sr.Quincy Girgorie, sr.Shaheen Elhage, sra. Giselle Mc William, sra. Ruthmlida Larmonie-Cecilia, sr. Ornelio Martina i sr. Ruisandro Cijnte. Frakshon di MFK a agregá un amienda. E moshon, inkluyendo e amienda, a keda aseptá pa Parlamento.
Despues Parlamento a trata e siguiente punto di agènda ‘Desishon riba kontinuashon di trabounan di e periodo parlamentario 2021-2025 konforme art. 116 Reglamento di Orden’. Parlamento a bai di akuerdo ku e proposishon di komishon sentral di 28 di yüni último.
Por último a trata e punto di agènda ‘Tratamentu di karta di Kontrolaria General Kòrsou fechá 30 di yüni 2025 enkuanto proposishon di kandidato pa miembresia di Kontrolaria General Kòrsou’. Parlamento a skohe sra. Arias komo e kandidato preferensial.
Presidente di Parlamento a sera e reunion.
