𝐌𝐢𝐧𝐢𝐬𝐭𝐞𝐫 𝐂𝐡𝐚𝐫𝐥𝐞𝐬 𝐂𝐨𝐨𝐩𝐞𝐫 𝐭𝐚 𝐩𝐚𝐫𝐭𝐢𝐬𝐢𝐩𝐚́ 𝐧𝐚 𝐞 𝐝𝐢 𝟒𝟎 𝐊𝐨𝐧𝐟𝐞𝐫𝐞𝐧𝐬𝐢𝐚 𝐀𝐧𝐮𝐚𝐥 𝐢 𝐄𝐤𝐬𝐢𝐛𝐢𝐬𝐡𝐨𝐧 𝐊𝐨𝐦𝐞𝐫𝐬𝐢𝐚𝐥 𝐝𝐢 𝐂𝐀𝐍𝐓𝐎
𝐌𝐢𝐧𝐢𝐬𝐭𝐞𝐫 𝐂𝐡𝐚𝐫𝐥𝐞𝐬 𝐂𝐨𝐨𝐩𝐞𝐫 𝐭𝐚 𝐩𝐚𝐫𝐭𝐢𝐬𝐢𝐩𝐚́ 𝐧𝐚 𝐞 𝐝𝐢 𝟒𝟎 𝐊𝐨𝐧𝐟𝐞𝐫𝐞𝐧𝐬𝐢𝐚 𝐀𝐧𝐮𝐚𝐥 𝐢 𝐄𝐤𝐬𝐢𝐛𝐢𝐬𝐡𝐨𝐧 𝐊𝐨𝐦𝐞𝐫𝐬𝐢𝐚𝐥 𝐝𝐢 𝐂𝐀𝐍𝐓𝐎
Willemstad – Ministerio di Tráfiko, Transporte i Planifikashon Urbano Charles Cooper ta sumamente satisfecho pa anunsiá su partisipashon na e di 40 edishon di e Konferensia Anual i Eksibishon Komersial organizá pa e Caribbean Association of National Telecommunication Organizations (CANTO). E evento prestigioso aki ta tuma lugá for di 13 pa 16 di yüli 2025 na Nassau, Bahamas. E aña aki ta konta ku partisipashon di 52 Pais, 720 delegado i 14 minister di ICT den region.
E konferensia anual di CANTO ta sirbi komo plataforma esensial pa aktornan den sektor di telekomunikashon na nivel Karibeño pa diskuti, interkambiá idea, i eksplorá e mas resiente avansenan teknológiko. E tema di e edishon aki, “Towards a Unified and Sustainable Caribbean Gigabit”, ta enfatisá riba e ròl vital di telekomunikashon den promoshon di desaroyo sostenibel i ekspanshon ekonómiko regional.
Minister Cooper, huntu ku su ekipo di RAC i BlueNap, a kuminsá ku un seshon di planifikashon, despues di a registra ofishalmente, pa prepará pa nan partisipashon den e evento i atendé diferente invitashon risibí pa medio di CANTO.
Un di e momentunan importante, djadumingu 13 di juli, tabata e presentashon dirigi pa Bluenap Americas, kaminda diferente partner a mustra riba desaroyonan aktual. Sr. Giovanni King, direktor di Bluenap Americas, a ekspresá su rekonosimentu pa e kontribushon di Minister Cooper den e introdukshon di Digital Hub of the Americas na aña 2023, después ku introdukshon di Caribbean Datacenters Association na aña 2024. E trabou ta sigui aktivo, i den aña 2025 e fase di implementashon ta kristalese pa por fortalese e kapasidat digital den región Karibeño.
Durante e seshon, sinku (5) partner a presentá nan desaroyonan aktual i bista pa kolaborashon regional. E presentashonnan tabata di:
Gaia-X – solushonnan di data;
Bravinci – strategia riba data i seguridat;
Hitachi Global – solushonnan pa industria multinashonal;
Chunk Works – inovashon teknológiko;
Caribbean Datacenters Association – ekspanshon i konektivitat digital den e región.
Den oranan di atardi, tur minister responsabel pa teknologia digital, ICT, di e islanan Karibeño a tené un reunion ku e organizadó CANTO, seguidamente después pa e apertura ofishal di e evento huntu ku Prome Minister Sr. Phillip ‘Brave’ Davis.
Ta importante pa resalta ku Kòrsou ta risibi atenshon spesial den e región komo un lider den desaroyo digital. E liderato di Minister Cooper ta atraé atenshon di diferente entidat, tanto empresarial komo gubernamental, ku ta buska kolaborashon i informashon di minister Cooper.