Esaki tabata e prome reunion oficial di e Prome Minister Mike Eman cu e Cuerpo Consular.

Durante di e reunion, a trata varios topico importante, principalmente como continuacion di temanan anterior, cu e meta pa fortalece e relacionnan di cooperacion. E reunion tabata tambe un oportunidad pa cera conoci cu miembronan nobo di ACCA y pa intercambia punto di bista riba temanan cu ta relevante pa e comunidadnan cu nan ta representa.

Consulnan ta representa un pais na un otro pais, den e caso aki Aruba. Nan rol principal ta yuda ciudadanonan den caso di emergencia, duna servicio consular, promove comercio, cultura y cooperacion diplomatico. Na Aruba nos tin mas Consul Honorario cu Consul di Carera. Un Consul di Carera ta un funcionario diplomatico cu ta traha pa e gobierno di su pais. Un Consul Honorario ta generalmente un persona local cu ta representa un pais y ta fungi como e prome punto di contacto pa cu e gobierno di e pais cu e ta representa.

Debi na e importancia y colaboracion entre paisnan y nan ciudadanonan na Aruba, Prome Minister a expresa su compromiso pa tene reunion regularmente cu e Cuerpo Consular. Esaki pa sigura cu e liñanan di comunicacion y cooperacion diplomatico keda habri y solido.