Minister Silvania ta sigui traha pa eliminá e listanan di espera pa persona ku tin un  desabilidat intelektual 

 

 

Willemstad, 30 di yüli 2025 – 

Minister Javier Silvania di Salubridat Públiko, Medio Ambiente i Naturalesa a anunsiá  resientemente ku e tin intenshon di aselerá konstrukshon di mas bibienda pa persona ku  tin un desabilidat intelektual. Esei ta nesesario, mirando e listanan largu di espera ku tin na  SGR Groep. Debí na esei, tin un grupo grandi di persona ku desabilidat intelektual ku no tin  akohida p’e aktualmente. Entretantu, a start konstrukshon di Kas Amerigo Thodé. Entrega  di e bibiendanan akí ta planiá pa yüni di 2026. 

Awe, a bira konosí ku SVB a duna palabra pa yuda finansiá e bibiendanan nobo na Kaya  Aron ku lo wòrdu realisá riba enkargo di SGR Groep. Na Kaya Aron, lo bini bibienda pa 24  persona ku desabilidat intelektual i 6 persona ku outismo grave. E finansiamentu parsial di SVB ta nesesario komo garantia, pa SGR Groep por haña un hipotek pa konstrukshon di e  kompleho nobo. Kosto total di e konstrukshon na Kaya Aron ta presupuestá na Cg. 4.952.000 i SVB lo aportá Cg. 2,0 mion di e suma ei. Pa restu di e suma, esta, kasi Cg.  3 mion, SGR Groep lo sera un hipotek. 

Minister Silvania: ‘Mi ta masha kontentu ku a dal un paso mas pa eliminá e lista di espera  pa persona ku desabilidat intelektual, mediante konstrukshon di bibienda adekuá. Komo Minister di Salubridat, mi a hiba diferente kòmbersashon amplio ku tantu SVB komo SGR  Groep pa tuma medida pa yega na mas fasilidat pa hende ku desabilidat intelektual.  

Resultado di esei ta ku awor SVB a duna un garantia, di manera ku SGR Groep por sigui ku realisashon di e kompleho nobo na Kaya Aron.’ 

Minister a sigui bisa: ‘Hende ku desabilidat intelektual ta parti di nos komunidat, pero loke  mi ta konstatá ta ku hopi bes, ta lubidá riba e grupo akí sí. Ma nan tambe tin mi atenshon i, komo Minister di Salubridat, mi ta hasi mi esfuerso pa nan tambe por haña e fasilidatnan adekuá.’