Gobierno pendiente pa e situacion den region
Gobierno pendiente pa e situacion den region
ORANJESTAD – Gobierno un biaha mas a pidi reunion cu tur autoridad envolvi riba siguridad nacional di nos pais, pa asina haya un update riba e situacion actual den region.
Prome Minister mr. Mike Eman ta sigui mantene e comunidad informa di tur locual ta relaciona cu e situacion aki.
Riba 26 di augustus a tuma luga un briefing importante cu commandeur Walter Hansen, Commandant der Zeemacht den Caribe, hunto cu Prome Minister Mike Eman, Conseho di Minister, acompaña pa Secretario General di Ministerio di Asunto General Robert Candelaria y Secretario di Conseho di Minister Indra Duarte, representante special di Directie Buitenlandse Betrekkingen, Annemarie Verrijp (DBB), Director di Directie Buitenlandse Betrekkingen (DBB) Jocelyne Croes y Director di Veiligheidsdienst Aruba Juri Nicolaas (VDA) riba e situacion entre Merca y Venezuela.
E reunion a duna un bista cla y detaya riba e situacion di siguridad regional y su posibel efecto riba e islanan Aruba, Corsou y Boneiro.
Gobierno ta aprecia e trabou y dedicacion di tur autoridad envolvi, cu ta yuda pa mantene pas y siguridad den nos region. Pa e siguridad di nos isla, nos ta depende di e autoridadnan competente di nos pais.
