Toespraak van minister Javier Silvania S.V.B. 65 jaar

 

Bon dia presente nan, 

Nos Banko di Seguro Sosial awe a kumpli 65 aña sirbiendo pueblo di  Kòrsou, pabien!. Ta bon pa bisa ku pa 25 aña a sirbi tambe e pueblo di  Aruba, te ku 1985, i e otro islanan di Antia te ku aña 2010. 

Danki na un persona vishonario manera sr. Ciro Kroon, ku nos ta rekordá awe ku nos ta para aki, 65 aña despues. Awe nèt 65 aña pasa komo Minister  di Asuntunan Sosial e la instituí e Lei di AOV, nos penshun di behes, i a  instituí e órgano pa ehekutá seguronan sosial den nos komunidat. 

Tur hende den nos komunidat por konta ku nos Seguronan Sosial, ora  nan tin (mas) mester di esaki. Esaki ta un gran logro grandi di nos  komunidat i nos mester pèrkurá pa e por wòrdu mantené pa futuro  generashon nan. Sea ta por ehèmpel pa gastunan médiko ora malesa toka na 

nos porta, pa un penshun di behes chikí (mi ta bini bek riba esaki mas aki ratu..), pa kuido pa esnan ménos abilitá den nos komunidat òf pa e asina  jama plaka di malesa, ora ku nos no por traha pa motibu di kebrante di salú. 

Banko di Seguro Sosial ta é organisashon ku ta ehekutá leinan di seguro  sosial den nos komunidat i ta duna servisio for di momentu ku un baby nase  te despues di su edat di penshun. SVB ta un organisashon prominente den  nos komunidat ku nos tin ku kuida i mantené. Ta e úniko organisashon ku 65  aña ku di eksperensia den ehekushon di Leinan di seguro sosial ku nos tin. 

Nos por bisa ku kompará ku por ehèmpel region i hopi otro parti nan di  mundu, nos ta un ‘trendsetter’ den e área aki. 

E vishon di sr. Kroon di 65 aña pasa, ta kuadra kompletamente ku e  vishon di e Gobièrnu aktual: esta pa traha riba provishon- i areglo nan  pa esnan mas vulnerabel den nos komunidat. Esnan ku mas tin mester di  dje. I pa tin un órgano di Gobièrnu pa ehekutá esaki, pa por duna kada 

siudadano asegurado derechi riba lokual e meresé a base di e Leinan. No tin duda ku un penshun di behes, un penshun pa un viuda i huérfano i  kuido médiko ta e areglonan di mas importante den seguridat sosial, espesialmente pa esnan di ménos rekurso den nos komunidat. I ta pa  eseinan e Gobièrnu aki ta para. Nos komunidat por ta orguyoso di esaki. 

Mi por ripití ku ta hustamente pa e penshonadonan, un grupo  vulnerabel, ku ta hopi na mi kurason, nos ta hasiendo tur esfuerso pa  por adaptá e penshun di behes AOV, di manera ku e grupo aki por hala 

un rosea trankil fin di luna. Pa Ma Yeye tambe por hala rosea trankil fin di  luna! Den kuadro di esaki manera mi a anunsiá resientemente, a lanta un  komishon multidisiplinario, konsistiendo di diferente eksperto i  naturalmente SVB tambe, pa di un manera responsabel subi e penshun di  behes, manera nos grandinan meresé! Mi tin pleno konfiansa den e  komishon i ku e ekspertonan lo bini ku un solushon promé ku fin di e aña aki. Si mi a primintí, i Si e Gobièrnu aki lo kumpli! 

Ta nos grandinan a bai nos dilanti i konstruí e fundeshi di nos komunidat. Ta  nos mayornan, nos tanta i tionan i den futuro nos tur. 

E mishon aki lo keda punto di salida den futuro pa tur akshon di SVB. I ta  huntu ku e personal motivá i entusiasmá nos ta keda para pa e mishon aki. Mi tin tur konfiansa ku e Gobièrnu di awe tin mesun i kisas aun mas  vishon, pa asina rekonosé i implementá e ahustenan nesesario pa ku e  areglonan di seguro sosial i nan benefisio nan pa nos komunidat, di  manera ku aki 65 aña nos por konta ainda ku e benifisionan ku e  seguronan ta brinda nos komunidat manera señor Ciro Kroon a  visualisá i nos a bin ta disfrutá di dje pa 65 aña.  

Mi kier finalisá gradisiendo na promé lugá e penshonadonan i aseguradonan,  e kolaboradornan, trahadó nan i dunadónan di trabou (kòrda kontribuí nechi  ku e prima nan pa por sigui paga Ma Yeye su penshun), komunidat en  general pa e apoyo ku SVB a bin ta risibí di nan den nan afan pa duna  servisio. Na tur e eks-ministernan di Banko di Seguro Sosial, Huntanan di  Supervishon, nos eks-direktornan, danki na nan tur. Un gradesimentu  spesial na personal di SVB ku for di 1960 a laborá i duna servisio na  esnan mas vulnerabel den nos komunidat i a sabi di duna servisio aña aden aña afó na nan. Spesialmente na boso un danki di kurason. 

Danki i ban pe siguiente 65 añanan; ban sigui brinda e servisionan na  nos penshonadonan, viudo-, viuda- i huérfano nan, na esnan ménos  abilitá den nos komunidat i na esnan ku mester di seguro di malesa.