Presentacion ta tuma lugar na Biblioteca Nacional Aruba, dia 22 di october 2025 di 6or pa 8or di anochi. Sr. Frank a traduci dos obra clasico cu ainda despues di siglonan ta relevante, impactante y impresionante.

Ta considera e Republica di Plato un di e obranan mas influente den filosofia y literatura occidental. Pa medio di dialogo y debate, Plato ta atende temanan cu ta vigente te cu dia di awe manera husticia, educacion, moralidad, y e rol di liderazgo den sociedad. Danki na e traduccion di Frank na Papiamento, e perspectivanan aki ta keda accesibel y atractivo pa e lectornan contemporaneo.

E Manual di Epictetus ta refleha e poder etico y claridad di filosofia estoico, enfatisando integridad, dominio propio y libertad personal. Epictetus, nace como catibo pero lantando pa bira un di e filosofonan mas respeta di su tempo, a influencia generacionnan di pensado, incluyendo e emperador romano Marco Aurelio. Asina un influencia grandi Epictetus su pensamentonan tabata tin. E traduccion  aki na Papiamentu ta hasi su siñansanan ainda tangibel.

Tocante Richard A. Frank

Sr. Richard A. Frank, ingeniero kimico naci na Aruba, a traha 33 aña profesionalmente den e industrianan di diseño den ingenieria, operacion di rafinacion di petroleo, maneho di produccion di coriente, y maneho di produccion di awa pa bebe. Na 2024 ingeniero Frank a retira y ta dedicando su mes awo full-time na un di su pasionnan di semper: skirbi creativo, y lesa. Un cambio radical di traha y pensa den un mundo tecnico profesional rigido y exacto pa e exploracion reflectivo y activo di un mundo artistico di imaginacion y expresion literal. Un reto nobo y sumamente interesante.

‘Republika’ y ‘E manual’ na Papiamento lo ta na benta e anochi di presentacion. Tur dos obra lo ta obtenibel na librerianan local pronto.

Sr. Frank a publica ‘Essays on balance’ na 2016 y e obra aki ta den Coleccion nacional (Dept. Arubiana) y e autor tambe a publica ‘Light’ na 2021, ‘The Diary of Aloisius Braendt’ na 2022, ‘Twelve Moons’ na 2023 y a skirbi storia pa ‘Antalogia Arubano ’na 2024.

Su traduccionnan recien di ‘Republika’ y ‘E manual’ na Papiamento ta marca un logro importante den haci textonan filosofico fundamental accesibel pa e comunidad di Aruba.

Mas informacion por haya via e link aki.