A fayesé; Jeroen Leinders, Direktor di e pelíkula premiá ‘Tula: The Revolt’.
A fayesé; Jeroen Leinders, Direktor di e pelíkula premiá ‘Tula: The Revolt’.
Ku gran tristesa nos ta anunsiá ku Jeroen Leinders a fayesé djaluna, 15 di sèptèmber, muchu tempran, na edat di 60 aña.
Jeroen tabata un hòmber di kreatividat insólito – skèrpi, komprometé i semper e tabata buska e mihó ideanan. El a laga un stèmpel inolvidabel den mundu di propaganda, kaminda el a traha hopi aña komo direktor kreativo i stratega, tanto na banda di kompanianan di merkadeo i propaganda (Saatchi & Saatchi) komo na banda di kliente (entre otro hopi aña pa Amnesty International, kaminda e tabatin e podio adekuá pa su odio kontra inhustisia). Komo direktor kreativo/ko-fundador na entre otro Baron Advertising, Stradius Strategic Brand Builders i XOXO, el a duna direkshon na hopi marka, tantu komersial komo no-komersial.
For di 2004, Jeroen a sigui su kurason i a dediká su mes na sine i produkshonnan audiovisual na banda di su aktividatnan di propaganda.
El a dirigí hopi komersial, pero pa públiko grandi el a bira mas konosí komo eskritor i direktor di e pelíkula ‘Tula: The Revolt’. Un sine tokante e rebelión di esnan sklavisá na Kòrsou na 1795. Un produkshon independiente di Jeroen i Dolph van Stapele.
E pelíkula, basá riba e buki ku Jeroen mes a skibi, a gana premio na Inglatera i Merka i tabatin un elenko di artista impresionante, ku Danny Glover, Derek de Lint, Jeroen Krabbé i difuntu Jeroen Willems.
Jeroen a keda aktivo den mundu di sine i resientemente e tabata traha riba un pelíkula kómiko na Boneiru, pero e no por a resistí pa huntu ku esei funda un skol Hulandes na Algarve, un siudat na Portugal ku e tabata stima.
Lo rekordá Jeroen komo un personalidad ku no ta topa hopi mas awendia; kreativo, profeshonal, stratega pragmátiko, kontadó pashoná di kuenta, pero mas ku tur: komo un kasá, tata, ruman, yu, tio i amigu di tur tempu, ku ken bo por hari i debatí, pero tambe komo un individualista tèrko ku hopi biaha tabata pushá bo te na e límite.
‘Un personahe úniko’, asina hopi hende lo rekordé.