Anthon Casperson ta splika!!!

27 DI OUGÙSTÙS ÚLTIMO

27 di ougùstùs último, mi a ventilá riba Face book, mi opinion tokante e blackout ku nos isla a eksperensia e dia ei. Mi a splika, ku bientu no mester ta rason pa tin un blackout. Mi argumento ta ku nos ret di distribushon di elektrisidat lo mester tin protekshon den dje, ku fluktuashon di frekuensia pa motibu di desbalansa den kapasidat di produkshon i demanda na sierto momento, no mester afektá e régimen di produkshon konvenshonal. Un suich di protekshon lo por a deskonektá un par di bario for di e ret di distribushon i asina evitá un blackout. Natural semper lo e ta fèrfelu ora barionan pèrdè elektrisidat, pero un tal senario asina ta di preferá ku un blackout.

MI AFAN

Mi a splika den e komentario aki tambe ku mi afan, no ta pa kibra ningun profeshonal of mandatario. Mi ta kere ku un suseso asina manera un blackout, ta importante, si kolektivamente nos komunidat por diskutí i debatí ku otro alkaso, kaminda nos tur ta komprondé e prinsipionan básiko di un sistema di suministrá elektrisidat. Ta solamente e meta aki a pone mi publiká mi komentario.

KORANT DI AWE 19 DI SÈPTÈMBER 2025

Mi a tuma nota awe den korant, ku ayera tabata tin splikashon di promé minister den Staten tokante di e suseso aki. Mi ta tuma nota tambe di ekspreshonnan di nos promé minister riba entre otro komentarionan di eks gerente di Aqualectra. E korant ta skirbi ku si e eks direktornan aki a hasi nan trabou manera debe ser den pasado, e kosnan aki no lo a pasa den e tempunan ei. E korant ta sigui splika, ku segun promé minister den e tempunan ei, tur hende mester a pone bela na man, pasobra regularmente koriente tabata bai.

DI 1999 TE KU 2011

Mi tabata tin e honor di a forma parti di gerensia di Aqualectra den e periodo di 1999 te ku 2011, momentu ku e gobièrnu di e tempu ei a hiba di opinion ku e gerensia mester a bai kas, i nan a hasi esei tambe. Di 1999 te ku 2006 mi a fungi komo e gerensia finansiero i di 2006 te ku 2011 mi a fungi komo gerente general di e empresa.

Den e periodo di 1999 te ku 2011, Aqualectra tabata tin solamente un of ta dos “blackout”. Tabatin sierto insidente si, kaminda gran parti di e isla (aproksimadamente 70%) a keda sin elektrisidat, por ehèmpel un bes den tempu di orkan, kandela den planta òf un wèlga ku tabata tin riba tereno di ISLA, pero esaki no tabata un “blackout” kompleto. Den tur e kasonan aki, e “load shedding” a tuma lugá den un manera kontrolá i dominá, kaminda despues e restablesimentu di e ret di elektrisidat (tur hende ku elektrisidat) a tuma lugá den 2 pa 3 ora.

Mi tin tambe tur e sifranan di interupshonnan parsial (load shedding) ku a tuma lugá di 2006 te ku 2011, i tambe di e kantidat i durashon di e interupshonnan aki den e tempu ei. Nos por konstatá ku e interupshonnan aki, tabata ménos ku lokual nos ta eksperensia awor aki.

DEN KONTEKSTO

Di otro banda, nos semper mester pone tur kos den un konteksto di tempu pa nos komprondé e difikultatnan ku e empresa a i ta pasa aden. Den nos tempu tabata tin e (i) transishon di produkshon di elektrisidat ku turbinanan di stom pa ku mashinnan di diesel i (ii) e transishon di produkshon di awa ku mashin pa evaporá awa pa sistemanan di reverse osmosis. Tambe den e tempu ei mester a integrá e kompania di produkshon i distribushon di awa i elektrisidat huntu, ku nos konosé awe komo Aqualectra.

Aktualmente e empresa mester pasa dor di e transishon energétiko, kual transishon ta enserá imbershonnan kuantioso i tambe kambio di diferente prosesonan den e empresa. Meskos den nos tempu, e gerensia aktual, no tin un tarea fásil akinan i nan mester di tur sosten di nan gobièrnu i tambe di komunidat pa kontinuá ku e trabou aki. Nan mester di e sosten awor aki i tambe nan mester keda ku e sosten den futuro, ora ku nan no tin e enkargo mas, pasombra falta di e sosten aki, ta kita e konfiansa nesesario di nos komunidat den nan i den e empresa.

P’esei den tur kaso, e ta importante pa nos tin nos “facts” bon riba un rei i no saka konklushon riba persepshon ku no ta kuadra. Esaki sigur lo no yuda e debate ku nos komunidat al kaso. Mi ta keda boga pa nos debatí ko otro pa drecha kos, i no pa kibra otro. Den e kuadro aki, spesialmente nos mester evitá polémika, i argumentá kosnan di den pasado i aktual ku tin base.