Lokèt di Pèrmit a lansa Grupo di Enfoke riba Transporte Eskolar
Maneho di Gobernashon, Planifikashon i Servisio Públiko
Lokèt di Pèrmit a lansa Grupo di Enfoke riba Transporte Eskolar
Publiká riba 21 Sèptèmber 2025
WILLEMSTAD — Djabièrnè, 19 di sèptember 2025, Lokèt di Pèrmit a tene su promé seshon di “Grupo di Enfoke”, den e kuadro di Transporte Eskolar 2025-2026. Na hulandes esaki yama ‘Focusgroep’.
Den e kaso aki e seshon tabata pa tuma ‘feedback’ direkto i tende opinionnan for di un grupo selektá di partisipantenan. E personanan aki ta hasi Uso regular di e servisio pa Transporte Eskolar. E afan ta pa yuda mehorá kalidat i efisiensia di e transporte menshoná.
E enkuentro di e Grupo di Enfoke a tuma lugá djabièrnè 19 di sèptèmber 2025, na Lokèt di Pèrmit den Eurobuilding, situá na Salinja 127. Stakeholders ku a partisipá tabata e klientenan, Vergunningenloket, ‘Uitvoeringsorganisatie Onderwijs en Wetenschap i ABC Busbedrijf. Informashonnan importante a keda kompartí ku ta bai yuda halsa e servisio un poko mas.
E inisiativa aki tin e lema: “Ekspresá, Kompartí i Traha Huntu.” Esaki ta reflehá e kompromiso ku Lokèt di Pèrmit tin pa kolaborá ku su klientenan. Asina aki Lokèt di Pèrmit ta krea un servisio mas efektivo ku lo duna mas atenshon na e nesesidatnan. Lokèt di Pèrmit ta kontentu ku tur hende ku a asistí i a kontribuí ku nan balioso opinionnan.
Pa mas informashon, por tuma kontakto ku Lokèt di Pèrmit na 433-3123.
