Cft: “Finansiamentu di sistema di kuido di Sint Maarten no ta sostenibel”
Cft: “Finansiamentu di sistema di kuido di Sint Maarten no ta sostenibel”
Philipsburg – Sint Maarten tin añanan ta luchando ku défisitnan struktural serka e fondonan di kuido. Si no tuma akshon, e situashon ta bira insostenibel. Ta di sumo importansia pa Sint Maarten implementá e seguro médiko general mas pronto posibel.
Cft tin bastante tempu ta ekspresá su preokupashonnan tokante di e défisitnan serka e fondonan di kuido, ku ta kousa pèrdidanan serka Uitvoeringsorgaan Sociale en Ziektekostenverzekering (SZV). E défisit kumulativo serka e fondonan di kuido den e periodo 2010 te ku 2023 ta asendé te aproksimadamente XCG 500 mion. E añanan benidero, SZV ta antisipá défisitnan di XCG 30 pa 35 mion pa aña. Aktualmente ta kompensá e défisitnan aki pa medio di surplusnan, prinsipalmente di e penshun di behes (AOV). Komo konsekuensia, e reservanan di e fondo ta baha rápidamente. Fondo Monetario Internashonal asta ta pronostiká ku e reservanan líkido lo keda agotá na 2029.
Tuma medidanan
Ta di importansia ku tin balanse entre ingresonan i gastunan. Den kaso di Sint Maarten, e gastunan di kuido strukturalmente ta surpasá e ingresonan, loke ta kousa un défisit. Esaki ta un riesgo grandi pa finansas gubernamental. E añanan benidero, e poblashon di Sint Maarten lo sigui embehesé. Pa un sistema sostenibel, tur hende mester kontribuí un “fair share”. Cft tin bastante tempu ta urgi ku mester tuma medidanan pa redusí e défisitnan. Sint Maarten ta traha riba un seguro médiko general (GHI/SAAHA) ku ta spera di kondusí na ingresonan di prima mas haltu i gastunan manehabel. Sinembargo, e trayekto legislativo ta kanando pa mas ku dies aña kaba. Cft ta pidi tur stakeholder embolbí, inkluyendo Minister di Salubridat Públiko, Desaroyo Sosial i Trabou, Minister di Finansas, SZV i e hospital (SMMC/SMGH) pa kolaborá i atendé ku e problemátika.
Cft tambe ta enfatisá e importansia di e sobrá medidanan ku Sint Maarten ta trahando riba dje, manera e uso mas frekuente di remedinan genériko, un ròl mas fuerte pa kuido primario (dòkter di kas) i eskohonan mas konsiente respekto di trasladonan pa kuido médiko den eksterior. E plannan aki a ser trahá basta tempu pasá. Awor ta trata di implementashon.
Presupuesto pa 2025 i 2026
E presupuesto pa 2025 a ser aprobá na yanüari 2025 pa Parlamento, i a keda stipulá basta tempu despues, riba 10 di yüli di e aña aki. Esaki ta mas ku seis luna despues di e fecha límite legal, 15 di desèmber 2024. Aktualmente, Sint Maarten ta trahando riba e presupuesto pa 2026. Cft ta urgi e pais pa hasi tur esfuerso pa stipulá e presupuesto aki promé ku aña nobo ta kuminsá. Di e manera aki, e pais por duna un paso importante den e mehorashon di maneho finansiero.
