No por registrá ni kùr vehíkulo motorisá sin VIN òf ku VIN falsu

Willemstad – Servisio Tráfiko i Transporte (UOVV) ta rekordá tur kliente ku no ta posibel pa registrá ni kùr vehíkulo motorisá sin un VIN (VEHICLE IDENTIFICATION NUMBER) òf ku VIN falsifiká. Den boka di pueblo, VIN ta konosí komo number di chasis.

UOVV a tuma nota ku último tempu e fenomeno di bin trata na registrá vehíkulo sin VIN òf VIN falsifiká a bolbé kuminsâ lanta kabes, espesialmente serka klientenan ku tin “motorfiets”. Sa sosodé ku tin otro tipo di vehíkulo tambe ku VIN falsu òf vehíkulo importá sin number di VIN.

Pa e motibu aki, UOVV huntu ku Kuerpo Polisial a bin ku un maneho muchu mas rigoroso, i a introdusí un proseso nobo pa detektá VIN falsu òf sospechoso mas lihé.

Asina ta prevení ku vehíkulonan motorisá hortá òf manipulá por wòrdú registrá na Kòrsou.

Tur vehíkulo mester tin un number di fabrika úniko (VIN). Sinembargo, UOVV ta mira ku kada biaha mas persona ta trata pa usa number falsu, hopi biaha despues di a horta.

Kòntròl mas estrikto:

Durante e proseso di kùr, ekspertonan lo kontrolá dokumentonan, VIN i e number di motor. Den kaso di duda, UOVV lo pidi informashon serka e fabrikante òf importadó. Si ta sospechá froude, UOVV lo avisá KPC direktamente, konformé maneho i proseso pa tipo di kasonan asinaki.

Protekshon pa siudadano:

Ku e proseso aki, UOVV ke fortalesé seguridat i protehá e konsumidó. Un kampaña públiko lo mustra kon hende por rekonosé VIN number falsu promé ku nan kumprá un vehíkulo.