WoMen’s  Steering Committee Curacao ta ekspresá preokupashon tokante situashon di e hende muhé

 

 

 

WoMen’s  Steering Committee Curacao ta ekspresá preokupashon tokante situashon di e hende muhé

WILLEMSTAD – WoMen’s Steering Committee Curaçao (WSCC) ta ekspresá preokupashon grandi tokante e situashon den kua e hende muhé i su famia ta aworakí. “Nos sosiedat ta enfrentá hopi tenshon i desafio sosial ku tin impakto dirèkt riba seguridat i posishon di e hende muhé i su famia,”sra. Mirieta Lourens – de Lanoy, presidente di WSCC a ekspresá 

Preshon sosial i fragilidat

“E retonan ku nos komunidat ta enfrentá ta rekerí atenshon. Retonan manera konsumo eksesivo di alkohòl, uso i benta di droga. Alabes nos ta preokupá pa abuso di e hende muhé na trabou, imigrashon ilegal i prostitushon. Pobresa i un falta grandi di toleransia den komunidat tambe ta kousa ambiente di ‘stress’, malesa i inseguridat. Esaki ta afektá e muhé mas fuerte. E sekso femenino, hopi biaha, sin sosten di un partner, mester protehá su mes, i su yunan. E preshon di situashonnan sosial i laboral ménos favorabel i tambe violensia (verbal i korporal) i desigualdat ta hasi situashon di e hende muhé hopi difisil i preokupante,” Sra. Lourens – de Lanoy a sigui bisa.

“Un otro punto ku ta preokupá nos hopi ta e influensia di media sosial (‘social media’). Hóbennan ta krese den un mundu digital ku tin oportunidat, pero tambe ta kargá ku hopi riesgo i desafio. Media sosial ta transmití influensia ku hopi biaha ta kontradisí e fundeshi di norma, balor, rèspèt i solidaridat ku tabata haltu den nos komunidat. Traha sèn fásil, fomentá éksito superfisial i intoleransia ta bira normal pa e hóben. Esaki ta stimulá nan pa kue e kaminda robes. Ta e hóben mester mester sigui karga nos sosiedat. E mester di guia pa e bira un siudadano ehemplar.” 

Ròl di e muhé den komunidat

WSCC ta enfatisá ku e hende muhé na Kòrsou semper tabatin un ròl fundamental den protekshon, desaroyo nan famia. Su kapasidat pa duna guia na nan yunan ta di balor grandi. Pero sin sufisiente sosten i protekshon, nan forsa ta debilitá. Ora laga e hende muhé kai, henter komunidat ta kai.

Akshonnan konkreto ku mester tuma

WSCC ta proponé pa, huntu ku gobièrnu, skol, organisashonnan sosial i tur siudadano tuma un seri di akshon:

1. Medidanan gubernamental

• Krea un Programa Nashonal pa hende muhé i famia ku ta uni  tur bario pa lucha kontra pobresa, sosten den kriansa i protekshon kontra trafikashon di hende i violensia doméstiko.
• Forma un tim di krísis pa e hende muhé frágil tin akseso lihé na entre otro yudansa legal, kas di refugio i guia sikológiko.
• Reforsá leinan i kolaborashon ku polis, i kadena di hustisia kontra trafikashon di hende i uso i benta di droga.

2. Edukashon

• Integrá alfabetisashon digital i resistensia kontra ‘sosial media’ den kuríkulo di skol, pa hóbennan por resistí kontra influensia negativo.
• Desaroyá programanan di resistensia pa hóbennan: tayernan den skol pa oumentá e konfiansa den su mes, fomentá relashon basá riba rèspèt, norma i balor i bida saludabel.
• Empoderá mas kolaborashon entre kas i skol.

3. Komunidat i òrganisashonnan sosial

• Fomentá programanan di ‘mèntoring’ kaminda hende muhé fuerte i modelo ta guia hóbennan.
• Mobilisá iglesia, klupnan di deporte i sentronan di bario pa krea lugánan sigur kaminda hóbennan por haña formashon i guia.
• Stimula inisiativanan den bario pa uni muhénan pa ku nan por sostené otro den desafio ekonómiko i sosial.

4. Forsa ekonómiko di hende muhé

• Invertí den kursonan i krédito mikro pa e hende muhé ku ke start su propio negoshi.
• Hiba polítika dirigi pa e hende muhé tin mas akseso na trabou ku ta paga salario hustu i asina krea mas stabilidat den famianan.
• Stimulá ku kompanianan ta habri mas oportunidat di trabou pa e hende muhé.

Responsabilidat kolektivo

WSCC ta insistí ku e situashon aki ta pidi pa akshon di nos komunidat den su totalidat. No ta sufisiente pa indiká problema, pero nos komunidat tin mester di akshon real. Pa e motibu ei, nos di WSCC ta ekstendé nos man na organisashon pa partner i traha huntu pa un Kòrsou kaminda e hende muhé ta pará mas fuerte, hóbennan ta protehá i famianan haña bèk siguridat i speransa.