‘Preokupashon profundo relashoná ku kanselashon di Reunion Públiko tokante Landsontvanger i e opstrukshon  sistemátiko di e tarea di supervishon di Parlamento.’ 

 

---

 

 

 

 

 

 

Presidente di Parlamento di Kòrsou 

Señor Fergino Brownbill 

Wilhelminaplein #4 

PRESENTE 

Willemstad, 17 di òktober 2025 

Tópiko: ‘Preokupashon profundo relashoná ku kanselashon di Reunion Públiko tokante Landsontvanger i e opstrukshon 

sistemátiko di e tarea di supervishon di Parlamento.’ 

Referensia: PNPFR2025/2203 

Apresiabel Presidente di Parlamento di Kòrsou, señor Brownbill, 

Na nòmber di frakshon di Partido Nashonal di Pueblo (PNP), nos ta dirigí nos mes na bo ku un sintimentu mashá preokupá i urgente. E kanselashon abrupto di e reunion públiko, planiá pa djabièrnè 17 di òktober, den nos opinion ta un desaroyo sumamente alarmante ku ta toka esensia di nos demokrasia parlamentario. 

E reunion akí ta di sumo importansia pa trese e klaridat nesesario riba e krísis profundo ku a surgi na Landsontvanger i pa yama Gobièrnu pa responsabilisá. 

E echo ku a kanselá e debate akí sin motibunan di peso, sin outorisashon di e inisiadónan, hustamente na un momento ku komunidat ta eksigí kontesta, nos frakshon no por interpretá esaki otro ku komo un intento deliberá pa frustra e tarea di supervishon di Parlamento. Esaki no ta simplemente un kuestion di prosedura; e ta un akto ku ta stroba Parlamento di ehersé su deber konstitushonal i ku ta opstruí seriamente e búskeda pa bèrdat. 

E konteksto di e kanselashon akí ta hasi e situashon ainda mas serio: 

• Tin akusashonnan sumamente grave di intervenshon polítiko, instrukshonnan ilegal i mal maneho finansiero. 
• E resién supuesto traspaso di e èks-Minister responsabel pa un stul den Parlamento, despues ku na promé instante el a anunsiá públikamente riba medionan sosial ku e lo no baha, ta lanta e impreshon di ta un ruta di eskape pa hui di responsabilidat ministerial. 
• Landsontvanger mes a pidi públikamente dispensashon di su obligashon di sekresia (Artíkulo 50 ALL) pa e por informá Parlamento kompletamente tokante e preshon polítiko ku ta keda ehersé riba dje i su aparato. E reunion kanselá tabata e plataforma korekto pa trata e petishon akí di un forma relevante.

Honorabel Presidente, e kombinashon di e echonan akí ta pinta un kuadro di un patronchi preokupante, un modus operandis kaminda e gabinete akí, sostené pa e partido mayoritario den Parlamento, ta mina aktivamente e poder di supervishon di Parlamento. E ta un atake direkto riba e prinsipionan di transparensia, bon gobernashon i e checks and balances ku ta definí nos estado di derecho. Pueblo di Kòrsou tin derecho di sa e bèrdat, i ta nos deber komo representante di pueblo pa saka esaki na kla. 

P’esei, frakshon di PNP ta hasi un apelashon formal i urgente na bo, komo wardador di e kas demokrátiko akí i di e órden parlamentario, pa: 

• Agendá e reunion públiko kanselá di nobo ku e máksimo prioridat posibel. ● Insistí serka Gobièrnu pa sin tardansa otorgá e dispensashon di e obligashon di sekresia ku a pidi pa Landsontvanger, pa asina Parlamento por keda informá kompletamente i sin sensura. 
• Garantisá na tur momento e derecho i deber di Parlamento pa kontrolá gobièrnu, i pa kondená i kontrarestá kualke intento pa opstruí esaki. 

No por, ni mag ta’sina ku portanan di Parlamento ta keda será nèt na e momento ku bèrdat ta kla pa sali na lus. Nos ta konfia den bo esfuerso pa vigilá e integridat i outoridat di Parlamento di Kòrsou. 

Na nòmber di Frakshon di Partido Nashonal di Pueblo (PNP), 

Atentamente, 

Miembro di Parlamento (Parlamentario) 

Lider di Frakshon di Partido Nashonal di Pueblo (PNP) 

1. Konseho di Minister 
2. Gobernador di Kòrsou