WoMen’s Steering Committee ta onra presidentenan di último 50 aña Durante selebrashon di e di 51 aniversario di e organisashon

Willemstad: 16 di Oktober 2025

 

WoMen’s Steering Committee ta onra presidentenan di último 50 aña

Durante selebrashon di e di 51 aniversario di e organisashon 

WILLEMSTAD – Djarason 15 di Oktober direktiva di WoMen’s Steering Committee Curaçao (WSCC) a rekordá e echo ku 51 aña pasá un grupo di dama a funda e organisashon pa sali na interes di e hende muhé na Kòrsou i ta un voz di e grupo di enfoke aki i alabes aportá na temanan di interes general di komunidat di Kòrsou.

Representantenan di organisashonnan afiliá na WSCC, i invitadonan spesial, a reuní na Topaz Party Center pa asina konmemorá e fecha históriko aki. Despues ku sra. Mirieta Lourens – de Lanoy, presidente di WSCC a yama bon biní na esnan presente i ku pastor Curtis Meris, tata spiritual di e organisashon, a trese algun mensahe motivadó, a tira lus riba presidentenan ku durante último a dirigí WSCC. Sra. Lourens – de Lanoy a pidi sala un minüt di silensio na memoria di e eks-presidentenan di felis memoria i djei a pasa pa hasi entrega di un obra artístiko di Fantasy Arts na e eks-presidentenan i representantenan di eks-presidentenan ku no por tabata físikamente presente.

Orador spesial pa e anochi aki tabata sra. Dr. Maria Liberia – Peters kende a  konta algu di e lucha ku dirigentenan di WSCC a hiba pa asina eliminá diferente situashon di  deskriminashon i inhustisia ku tabatin kontra di e hende muhé. Dr. Liberia – Peters a bisa di ta hopi orguyoso di logronan di WSCC i e aporte ku miembronan di e organisashon pa realisashon di hopi meta na interes general di nos komunidat sin hasi distinshon di género. Alabes el a para ketu na un informashon ku a sali. hustamente riba e dia hístoriko aki, ku sifranan di abuso i agreshon den relashon di parehanan a oumentá drástikamente e aña aki. Den mes rosea el a vosiferá preokupashon p’e echo ku un organisashon manera ‘ombudsman’ (Defensor di Pueblo), ku a ser fundá a base di konseho i hopi trabou di preparashon di miembronan di direktiva di WSCC, dia di awe, lástimamente a informá ku e no ta haña oido, ni kontesta di Gobièrnu, riba masha hopi kaso ku Ombudsman (Defensor di Pueblo), a pidi Gobièrnu atenshon i solushon p’e. Alabes sra. Dr. Liberia – Peters a bisa ku banda di e echo ku e ta orguyoso di mira kon e sekso femenino a sigui diferente estudio pa traha riba nan konosementu i desaroyo, ta tuma nota ku, na kasi tur nivel eskolar, e hóbennan di sekso máskulino ta kana hopi atras. “Esaki ta un desbalanse den nos komunidat ku mester ta un punto di preokuapashon i ku mester duna atenshon serio na dje,” dr. Liberia – Peters a bisa. “Nos a kana un kaminda largu, per ainda tin hopi trabou pa realisá pa bienestar di tur gremio den nos komunidat.”

Despues di e presentashon konmevedor aki, sra. Lourens – de Lanoy, na nòmber di direktiva di WSCC, a otorgá un ‘Lifetime Achievement Award’ na sra Liberia-Peters pa su karera komo modelo, no solamente di e hende muhé kurasoleño, pero tambe pa e hende muhé di Karibe i mundu. Alabes sra. Lourens- de Lanoy a gradisí sra. Liberia – Peters pa su sosten i konsehonan, no solamente pa e direktiva aktual di WSCC, pero tambe di direktivanan di último sinku dékada.

Finalmente a pasa e parti final di agènda di e bunita anochi, ku oportunidat di konsumí algu, sosialisá i disfrutá di músika di Típiko Pasa Bon i Melania van der Veen.