Situashon di Koninging Juliana brùg

Situashon di Koninging Juliana brùg

Willemstad – Servisio pa Obra Públiko (OW) ta splika tokante situashon di Koninging Juliana brùg.

Riba djabièrnè 24 di òktober, ekspertonan di OW a tuma nota di algun sker den e asfalt di brùg na áltura di e viadukto lado di Otrobanda.

Huntu ku Kuerpo Polisial, a opta pa sera tráfiko riba brùg algun ora pa por investigá i saka afo kiko a pasa eksaktamente.

E viaduktonan bou di brùg ta konsistí di entre otro balkinan di betòn pegá na otro ku asfalt bashá riba nan. Na momentu ku e balkinan aki eksperensiá un asina yamá ‘inkrimping’ i “uitzetting” di e material, e balkinan aki ku pues ta konektá e viadukto na otro a move i krea dos skùr den e asfalt parti ariba di brùg. Esaki na ambos banda, i di un banda pa otro.

OW a tuma e desishon pa laga hasi e trabounan nesesario pa kita e skernan i evitá ku esaki ta sigui surgi. Aparte di esei lo sigui hasi e manteshonnan rutinario i nesesario na e brùg pa siguridat di tur usario. Pa awor por hasi uso di brùg sin preokupashon.