Promé Minister Pisas a risibí bishita di presidente di CONCACAF, sr. Victor Montagliani

WILLEMSTAD, 24 di òktober 2025 – Awe, Promé Minister di Kòrsou, Sr. Gilmar Pisas, a risibí na su ofisina e presidente di Confederation of North, Central America and Caribbean Association Football (CONCACAF), Sr. Victor Montagliani, durante su bishita ofisial di un dia na Kòrsou.

Durante e enkuentro, Promé Minister Pisas i Sr. Montagliani a sostené un diálogo produktivo tokante e kolaborashon entre Gobièrnu di Kòrsou, Federashon di Futbòl di Kòrsou (FFK) i CONCACAF, pa sigui mehorá e fasilidatnan deportivo riba nos isla.

Promé Minister a ekspresá su apoyo pa promové e desaroyo di futbòl na Kòrsou A papia tokante e idea pa un ‘soccer school’  pa duna oportunidat na nos hubentut ku tin talento pa sigui un karera den e mundo di futbòl.
E dos lidernan tambe a toka e tema di futbòl femenino, i a kompartí e mesun vishon pa fortalesé e partisipashon di muhénan den deporte.

Riba e agenda sr. Montagliani tin reunionnan ku e direktiva nobo di FFK, representantenan di  klupnan i otro miembronan di FFK. I tambe lo hiba kòmbersashonnan ku spònser i periodistanan.

Sr. Victor Montagliani ta liderá CONCACAF for di mei 2016, eligí abase di su vishon “ONE CONCACAF”, ku ta enfoká riba un mihó maneho di futbòl, mas torneo kompetitivo i oportunidatnan igual pa tur 41 estado miembro. Bou di su liderazgo, CONCACAF a logra kambionan remarkabel, manera e kreashon di CONCACAF Nations League, e re-strukturashon di e skemanan internashonal di wega pa tantu hende hòmber komo hende muhé, i e kreashon di Concacaf W, un programa stratégiko enfoká riba e kresementu di futbòl di hende muhé. Ku su re-elekshon na aña 2023 pa un periodo nobo te ku 2027, miembronan a mustra nan konfiansa den su liderazgo i vishon pa futuro. Sr. Montagliani no ta solamente presidente di CONCACAF, sino tambe visepresidente di FIFA, miembro di e konseho di FIFA, presidente di FIFA Football Stakeholders Committee i presidente di e Hunta di Direktiva di FIFA Ticketing AG. Esaki ta informashon di Federashon Futbòl Kòrsou.

Sr. Montagliani a ekspresá su apresio pa e progreso ku Kòrsou a logra den futbòl, i a reafirmá ku bou di su programa “ONE CONCACAF”, lo konta riba e apòyo kontinuo pa sigui avansá e deporte na un manera sostenibel i inklusivo.

E bishita di Sr. Montagliani na Kòrsou ta representá no solamente un rekonosimentu di e esfuersonan ku ta wòrdu hasí, sino tambe un paso mas dilanti pa fortalesé e laso entre CONCACAF, FFK i Gobièrnu di Kòrsou pa e kresementu di futbòl riba nos dushi isla Kòrsou.