Ta para trabounan di konstrukshon ilegal na áltura di Mahuma

Willemstad – Riba djaweps 30 di òktober alrededor di 7or di mainta, Projectteam Toezicht & Handhaving a haña un notifikashon ku tin un katapila kobando riba tereno di gobièrnu na Mahuma.

PTH mesora a presentá na e sitio i para trabounan di kobamentu pa traha fundeshi ilegal riba tereno di gobièrnu ku tabata tumando lugá. Esnan ku a hasi nan mes kulpabel na e akto aki, mester a pone e tereno bèk den su estado original. Nan mester a tapa e burakunan asina yama ‘funderingsleuvel’ ku nan a koba.

PTH a duna òrdú pa baha for di e tereno mesora. PTH lo sigui vigilá e área aki pa evitá ku ta sigui traha.

PTH ta enfatisá ku un persona ku a hasi un petishon pa legalisashon di tereno na Domeinbeheer, no por asumí ku e tereno ta di dje i ku e por traha numa riba dje. Pa por traha riba dje, mester tin un dekreto ministerial.

PTH ta atvertí tur persona ku ta traha di forma ilegal, pa stòp ku esaki i evitá di pèrdè bo invershon.