SDKK tabata presente na konferensia mundial di ICPA 2025 na Istanbul Turkia.

Willemstad/Istanbul – Resientemente a tuma lugá e konferensia di International Corrections and Prisons Association (ICPA) 2025. Esaki a sosodé riba fechanan 26 pa 30 di òktober 2025, aya na istabul Turkia.

Kòrsou tambe a partisipá i risibí e oportunidat úniko pa presentá su trabou i logronan riba e podium internashonal. Hefe di Kualidat & Audit di Sentro di Detenshon i Korekshon Kòrsou (SDKK), sra. Martha Jessurun, a ser selektá pa respresentá Kòrsou i tambe a duna un presentashon durante e Konferensia di International Corrections and Prisons Association (ICPA) 2025 na Istanbul, Turkia.

Kòrsou a keda skohe debi na e trabounan diario i esfuersonan hasi pa mehorá e kalidat i tambe reforma di e sistema di detenshon aki na Kòrsou. Tur esakinan a keda balorá i keda rekonosé komo puntonan positivo pa komishon internashonal. Tambe nos a kumpli ku e eksigensianan haltu ku ICPA ta pidi.

Pa nos di SDKK esaki ta un honor i rekonosementu pa por ta riba podium internashonal. Esaki ta demostrá ku nos ta traha tur dia di nobo na kalidat, transparensia i respèt pa e normanan di derechi humano.

E presentashon lo mustra kon Kòrsou ta implementá standardnan internashonal manera e Nelson Mandela Rules, i kiko hende lokal i paisnan ku mesun reto por siña for di esaki.

Ku partispashon di Kòrsou den ICPA 2025, ta un muestrá kon un isla chikí por tin un bos grandi den diskushon mundial tokante reforma di prizòn. Esaki seguramente ta un motibu di orguyo i un stimulashon pa sigui traha na un sistema di detenshon humano i efektivo.