Siman di Kaha di Òrgel 2025

WILLEMSTAD – Ministerio di Enseñansa, Siensia, Kultura i Deporte (ESKD) na nòmber di Gobièrnu di Kòrsou ta informá ku Siman di Kaha di Òrgel 2025 ta tuma lugá di 16 novèmber pa 23 novèmber 2025. E apertura ta riba djadumingu 16 novèmber 2025 na Riffort Village na Otrabanda di 17:00 pa 21:00.

Durante di e apertura mas ku 10 kaha di òrgel ta presentá, kor di alumnonan di skol di fundeshi Sint Antonius ta presentá, un kantante lo kanta huntu ku un kaha di òrgel,  adulto i hóben lo baila nos músika kultural. A la bes ta bai rekonosé dos baluartenan ku a sa di karga e patrimonio nashonal di nos herensia musikal intangibel ku ta e kaha di òrgel. E dos baluartenan ta: sr. Erwin (Winchi) Marta i sr. Julio (Jul) Reigina.

Gobièrnu ta hasi un invitashon na henter Pueblo di Kòrsou pa bin masalmente na e apertura kaminda nos ta selebrá un parti di nos herensia kultural musikal huntu i den union.