Ku lema: “Ban Karnaval 2026” Beehives ta lansa un temporada di karnaval históriko
Ku lema: “Ban Karnaval 2026”
Beehives ta lansa un temporada di karnaval históriko
Willemstad—Ayera den ouditorio di KONTENTU na Sambil, e organisashon di Beehives Curacao, a tene nan promé rueda di prensa, pa lokual trata e temporada benidero di karnaval, 2026. E enkuentro ku media lokal, a keda presentá pa e miembronan den maneho di Beehives, Athly Maria Vise Presidente, Germain Brunken, Presidente i Ryan Navarro, Tesorero.
E simpátika, Nicole Maduro a tuma enkargo komo anfitrion pa e enkuentro. Despues di a hasi un tremendo introdukshon ofishal di e invitadonan, e la anunsiá e lema pa 2026, “Ban Karnaval 2026” . Beehives, durante nan presentashon a presentá diferente idea nobo pa un temporada di karnaval ku ta prometé pa kambia historia.
Pa e aña aki Beehives ta duna honor na 3 baluarte kual ta Gilbert Gibi Doran, Marylin Milly Hart i Almocrates Mocky Job. E vishon pa e aña aki ta pa reuní henter komunidat bèk ku Karnaval. Aunke e tempu di Karnaval a kambia último añanan , nos ta komprometé pa rebibá i preservá e tradishonnan original ku ta definí nos identidat kultural, miéntras ku nos ta inová i trese un eksperiensha moderno i vibrante. Mesora, nan meta ta pa elevá i eksportá nos Karnaval internashonalmente, pa mustra nos ekselensia kultural riba e plataforma mundial.
Un di e notisianan ku a lanta mas atenshon di tur hende ta e presentashon di Machel Montano, e artista di mas grandi di Soca, na e apertura di Karnaval dia 3 di Yanüari. Otro anunsio importante ta ku e jump up ruta bieu Coca-Cola pa Biesheuvel lo tei bèk. E ruta tradishonal ku hopi hende tabata rekordá ku den pasado, lo tuma su lugá bek den Ban Karnaval 2026 pa duna e pueblo e sabor outéntiko di karnaval.
Beehives a konfirmá tambe un medida speshal pa komodidat di pueblo: Pa e promé bes lo tin mitar dia liber ofishal, pa asina ranka sali na tempu ku e marcha di despedida. Entre e inovashonnan grandi, Beehives a revelá ku lo tin un show di momo espektakular na St. Annabaai, dilanti di Handelskade. Un show visual i musikal ku lo kombiná kreatividat moderno ku e ambiente ikóniko di Kórsou pa sera e temporada di karnaval.
Durante e konferensha, Beehives a enfatisá ku “Ban Karnaval 2026” no ta solamente inovashon, pero un esfuerso pa trese bek hopi tradishon bieu ku ta forma parti di nos kultura karnavalesko. Un danki ta bai na patrosinadónan di a aña aki : Gobièrnu di Kòrsou, CTB , Curoil, Landsloterij, Aqualectra , DHL, Selikor, Pizza, KFC, Subway, Promenade, Essex, OMNI, VBC.
Beehives ta pidi tur hende pa sigui nan riba Facebook/Instagram i tambe bishitá bankarnaval.com, kaminda tur informashon lo wòrdu publiká konstantemente.
Link Presentashon : https://www.canva.com/
