14 KANDIDATA SKOHÉ PA SERTAMEN MISS DUTCH CARIBBEAN 2026
Den un sertamen di pre selekshon:
14 KANDIDATA SKOHÉ PA SERTAMEN MISS DUTCH CARIBBEAN 2026
DEN HAAG/WILLEMSTAD- Miss Dutch Caribbean ta den preparashon pa su di dos edishon ku lo tuma lugá den 2026. E sertamen di Miss Dutch Caribbean ta parti di Miss Nederland, kual ta un trayekto nobo ku a kuminsá e aña pasa, pa krea mas inklusividat pero tambe un plataforma pa damasnan di Karibe Hulandes ku ta bibando na Hulanda. Di e forma aki e damasnan por representá nan isla aki na Miss Nederland 2026.
Den kuadro di preparashon pa Miss Dutch Caribbean, resientemente a tuma luga un casting na e Kabinete di Minister Plenipotensiario di St.Maarten na Den Haag. Di e 35 inskripshonnan di e aña aki, 20 kanditata a keda invitá, di kual 14 kandidata a bira finalista pa e temporada nobo di 2026.
Den 2026 ta bai tin 11 kandidata kompetiendo pa e titulo di Miss Dutch Caribbean, mientras ku den 2026 tanbe a introdusí e kategoria di Teens. Den e kategoria aki lo tin 3 partisipante pa Miss Dutch Caribbean Teen. E kandidatanan ku gana, ta bai kompeti despues huntu ku e otro provincies, pa gana e titulo maximo di Miss Nederland y tambe Miss Nederland Teen. E dama ku gana Miss Nederland lo representa Hulanda na Miss Universe.
“Mi ta hopi orguyoso ku e aña aki nos tin e kategoria di Teens, pa asina tambe duna mas opportunidad pa nos Hobennan aki na Hulanda”, asina Presidente di Miss Dutch Caribbean, Alexandra Atalita a duna di konosé.
Miss Dutch Caribbean a logra duna diferente damasnan Karibense un plataforma na Hulanda kaminda nan por desaroyá i sigi pa nan metanan. E promé Miss Dutch Caribbean, Shashinduska Nazir, a sali komo di 3 finalista na Miss Nederland 2025. Tambe nan a yuda y sostene e representante di Miss Asia Pacific Curaçao 2025, Sherrylucia Morales na Filipinas. Miss Dutch Caribbean tambe a logra a gana e titulo di Beste Provincie dentro di Hulanda, den nan prome aña. Pa 2026, Miss Dutch Caribbean lo tin Kadushi Body Care komo Main Sponsor. Hopi di nan sponsorsnan ta bini di Karibe Hulandes bibando na Hulanda, demonstrando ku union ta hasi forsa.
Pa loke ta trata e kuerpo di hurado ku a skohe e 14 finalistanan pa e sertamen di 2026, a konsisti di un hurado di 6 inkluiendo Minister Plenipotensiario di St.Maarten, Drs. Gracita Regina Arrindell. E sertamen final lo tuma luga dia 8 di Maart 2026, na Theather Lampegiet na Veenendaal.
