Mérito meresí na empleadonan di VVRP

Willemstad – Riba djaweps 11 di desèmber, Ministerio di Tráfiko, Transporte i Planifikashon Urbano (VVRP) a duna rekonosementu i mérito bon meresí na su empleadonan den diferente forma.

Penshonadonan 2025:

VVRP a gradisí 7 empleadonan, ku den 2025 a yega e bunita edat di penshun, pa nan amor i dedikashon na e aparato públiko.

Hubilarionan 2025:

Un total di 12 empleado a selebrá nan hubilario trahando den gobièrnu durante 2025, esta a selebrá sea 12.5, 25, 30, 35 òf 40 aña den servisio.

Huramentashon òf promesa:

25 empleado nobo a huramentá òf hasi promesa dilanti di su ekselensia, Promé Minister Gilmar Pisas, representando Minister Charles Cooper komo Minister di VVRP.

Atraves di e evento speshal aki, VVRP a pone su empleadonan den lus positivo. Huntu, empleadonan di VVRP ta sòru pa entre otro nos kayanan ta asfaltá, pérmitnan di konstrukshon keda otorgá, ordená nos terenonan i mantené ordú, sòrú pa avionnan i barkunan por yega i sali for di Kòrsou na un manera seif, vigilá nos wer 24/7, kùr tur vehíkulo, i hopi mas.