Selebrashon ku skol speshal Marieta Alberto
Enseñansa, Siensia, Kultura & Deporte
Selebrashon ku skol speshal Marieta Alberto
Publiká riba 15 Desèmber 2025
Selebrashon pa skol speshal Marieta Alberto
WILLEMSTAD – Ministerio di Enseñansa, Siensia, Kultura i Deporte (ESKD) riba enkargo di Minister sr. Sithree van Heydoorn a organisá un aktividat den e ambiente di fin di aña pa tur maestro i alumno di skol Speshal Marieta Alberto. E skolnan (MLK/ZMLK/FSO/VSO) a partisipá ku tur alumno i maestro na e aktividat na Renassaince Wind Greek Curaçao Resort kaminda e promé grupo a desayuná i e di dos grupo a haña un almuerso.
Alumnonan di e promé skol a habri e mainta ku kanto di nos Himno, bou di guia di nan maestronan. Despues maestro di seremonia sra. Janine Pieterz-Maria a invitá funshonario sra. Vitalia Koster pa tene un diskurso chikí ku tambe na su turno a invitá un eks alumno di e skol pa konta di su bida awor ku e la kaba e skol. E alumno a konta kon e tin un famia, e ta traha, e tin un pick up, e tin dos yu i ta un siudadano responsabel den komunidat. Ku esaki a mustra na e alumnonan ku bo por logra den bida ku bo abilidatnan i asina keda enfoká riba positivismo den bida.
Minister enkargá ku enseñansa sr. Sithree van Heydoorn a tene un diskurso hopi emoshoná paso e energia i vibrashon positivo tabata asina altu ku esaki a traha riba tur hende su emoshon. For di komienso di e aña eskolar 2025/2026 minister a disidí di pone atenshon na alumnonan speshal. P’esei minister a enfatisá ku enseñansa mester inkluí tur alumno i ku tur mester haña e atenshon nesesario pa nan por desaroyá i logra na máksimo esfuerso. Minister a rekonosé presensia di sra. Marieta Alberto kende hopi aña pasá a kuminsá ku e vishon pa e skol speshal aki. Tambe un palabra di gratitut a keda dirigí na funshonario, direktiva di e skolnan i tur maestro ku ta laborá na e skolnan. Despues a sigui ku un tremendo programa kaminda DJ, Papa Pasku i presentashon di e alumnonan tur a keda presentá den un ambiente hopi ameno.
Ministerio di ESKD ta yama tur e koleganan ku a stòp ku nan trabounan di kantor i a bin duna un man pa sirbí e alumnonan durante di e mainta danki. Un danki di kurason na tur ku di un òf otro forma a sirbi e alumno. Nan final ministerio di ESKD ta deseá tur maestro, dosente i alumno un felis temporada di fin di aña i ta pidi henter e komunidat di enseñansa pa huntu ban selebrá den union i drenta 2026 ku hopi pas i felisidat.
—
KOMUNIKASHON
Selebrashon ku alumnonan di Marieta Alberto
