Parlamento di Kòrsou a kontinuá ku e tratamentu di e Presupuesto pa aña di servisio 2026

Djamars 16 di desèmber 2025, Miembronan di Parlamento a sigui ku e tratamentu di Presupuesto pa aña di servisio 2026. Durante e di dos dia di tratamentu, Parlamento a trata e dos último kapítulonan di e Presupuesto; kapítulo 18, relashoná ku e Ministerio di Salubridat Públiko, Medio Ambiente i Naturalesa i tambe kapítulo 15, relashoná ku e Ministerio di Desaroyo Ekonómiko.

Despues di preguntanan den e promé tanda, Promé Minister Gilmar Pisas i alabes minister di Asuntunan General a kuminsá ku e kontestanan di kapítulo 10 ku ta trata Órganonan di Estado i sobrá Órganonan general i kapítulo 11 ku ta parti di Ministerio di Asuntunan General i Relashonnan Eksterior, siguí pa e di dos tanda di pregunta, ku minister Pisas a kontestá tambe.

Na final di e deliberashon riba kapítulo 11, Parlamento a trata dos moshon kualnan a keda aseptá ku votonan general.

A kontinuá ku Minister Charles Cooper ku a kontestá preguntanan di Ministerio di Finansa, ku ta kapítulo 19 i kapítulo 14 ku ta kai bou di Ministerio di VVRP. Miembronan di Parlamento a haña e oportunidat di hasi pregunta den di dos tanda únikamente riba kapítulo 19 i e titular a kontestá mesora.

Djárason, 17 di desèmber 2025, Parlamento lo kontinuá ku e tratamentu di e Presupuesto ku preguntanan riba kapítulo 14 i sigui ku kontestanan i preguntanan den di dos tanda riba kapítulo 17, Ministerio di Desaroyo Sosial, Labor i Bienestar, kapítulo 13 Ministerio di Hustisia, kapítulo 12 Ministerio di Gobernashon, Planifikashon i Servisio Públiko, kapítulo 16 Ministerio di Enseñansa, Siensia, Kultura i Deporte. , i lo sigui tambe ku kapítulonan 18 Ministerio di Salubridat Públiko, Medio Ambiente i Naturalesa i 15 Ministerio di Desaroyo Ekonómiko.