Entidat Públiko Boneiru a kuminsá ku trabou na e lugá di stashoná outo di Kolegio Rayo di Solo. Intenshon di e trabou akí ta pa mehorá siguridat di tráfiko den serkania direkto di e skol i pa alumnonan, mayornan i empleadonan haña un mihó bista riba e situashon.

Den kuadro di e trabou akí, Direktorado di Planifikashon i Desaroyo (R&O) a tene un kòmbersashon konstruktivo i balioso ku konseho di alumno di e skol. Durante e konsulta akí e alumnonan a kompartí nan eksperensianan i puntonan di atenshon tokante e situashon aktual di tráfiko i nan a hasi pregunta tokante e tópiko i tokante ehekushon di e adaptashonnan planiá.

Aunke e trabou tabata planiá kaba, e Direktorado a eksperensiá aporte di e konseho di alumno komo sumamente balioso. E kòmbersashon a kontribuí na komprenshon mutuo i el a suprayá importansia di enbolbimentu di alumnonan ku desaroyonan ku ta afektá nan ambiente diario di skol.

Entidat Públiko Boneiru ta keda den kontakto direkto ku skol i lo informá tur persona enbolbí tokante progreso di e trabou.