“Steunend op eigen kracht, maar met de wil elkander bij te staan”

“Steunend op eigen kracht, maar met de wil elkander bij te staan”

E rapòrt “Steunend op eigen kracht, maar met de wil elkander bij te staan” di 5 desèmber 2018 i e reakshon riba e rapòrt aki di Gobièrnu di Kòrsou di dia 29 novèmber 2018 tambe mester ta riba agènda di Konseho di Minister di Reino riba 14 yüni 2019. Esaki parlamentario Curtley Obispo a indiká bon kla i raspa den e reunion di Parlamento di Kòrsou di dia 10 yüni 2019. Ta Staatssecretaris van Binnenlandse Zaken en Koninkrijksrelaties (BZK) Raymond Knops mes, a base di e “Instellingsbesluit evaluatiecommissie Rijkswet financieel toezicht” di 1 òktober 2018, a instalá un komishon ku a evaluá e Lei di Reino Supervishon Finansiero di Paisnan Kòrsou i Sint Maarten. I e komishon aki a produsí riba 5 desèmber 2018 e rapòrt balioso titulá “Steunend op eigen kracht, maar met de wil elkander bij te staan”. E Rapòrt riba página 14 te ku 19 ta duna 4 rekomendashonnan i tambe 14 punto di akshon balioso na Sekretario di Estado Raymond Knops, Konseho di Minister di Reino Hulandes i tambe Gobièrnu di Kòrsou. A base di e metodologia usa den e rapòrt i tambe e anekso 2 di e rapòrt riba página 28/29, ta importante di menshoná ku a yegá na e rekomendashonnan aki dor di konsulta 7 organisashonnan di Hulanda, 13 organisashonnan di Sint Maarten i 17 organisashonnan di Kòrsou.

Segun parlamentario Curtley Obispo ta trata di e rekomendashonnan balioso numerá 2,3,4,5 di e rapòrt ariba menshoná. Kual ta mustra bon kla e perspektiva di futuro i tambe e vishon nobo: Pais Kòrsou apoyando riba su propio forsa, pero ku e boluntat di ayudo mutuo den Reino Hulandes, mester sigui mehorá finansa publiko di Pais Kòrsou.  Tur esaki ku meta final aportá na progreso i bienestar di nos Pais Kòrsou. E 4 rekomendashonnan ta: (1) aklará i fortifiká e ròlnan i tambe responsabilidatnan di e diferente aktornan involukrá den e atministrashon di finansa di Pais Kòrsou i e sistema di kontabilidat efisiente (“financieel beheer”), (2) duna mas kontenido i sigui mehorá e relashon di trabou entre Pais Kòrsou i Kolegio di Supervishon Finansiero di Paisnan Kòrsou i Sint Maarten (CFT), (3) trata e atministrashon di finansa di Pais Kòrsou i e sistema di kontabilidat efisiente den relashon ku e metanan di finansa publiko sostenibel i kresementu ekonómiko,i (4) den konsulta gubernamental (“bestuurlijk overleg”) entre Gobièrnu di Kòrsou i Konseho di Minister di Reino Hulandes, yega na palabrashonnan konkreto di e fasilidatnan ku mester ta disponibel, pa asina por sigui mehorá e finansa publiko di Pais Kòrsou. Huntu ku e 4 rekomendashonnan aki,  e rapòrt a presentá un total di 14 puntonan di akshon konkreto na Sekretario d estado Raymond Knops, Konseho di Minister di Reino Hulandes i Gobièrnu di Kòrsou.