DISERTASHON DI PARLAMENTARIO JUNIEL CAROLINA MFK – LADRONISIA DI VEHIKULO
PREGUNTANAN DI PARLAMENTO JUNIEL CAROLINA MFK 19 NOV 2026
Nos tambe ta biba ku e sintimentu kaminda ku minister Shalton Hato a ekspresá durante e rueda di prensa di djárason 18 novèmber 2026 ku e ta preokupá ku hóbennan entre 14 pa 20 anja ta den kriminalidat i e mayoria biaha esaki ta motibu di e konfrontashon di problemanan sosial ku e famianan ta konfrontá mes kuné ku ta situashon finansiero, kasnan sin awa i koriente esnan mas ku ta bini dilanti.
Awe nos ta trata e tema deliberashon minister di hustisia enkuanto ladronisia di piesa i outo na Kòrsou, pero nos ta papia di ladronisia di outo sino ladronisia di vehíkulo pasombra no ta outo ta wòrdu hòrta, si no baiskel, fletbike i tambe bròmer ta wòrdu hòrta.
Komo parlamentario pa frakshon di MFK, mi ta mira tres problema ku mester wòrdu trata huntu:
- Prevenshon i seguridat: Kon nos por prevení ladronisia di vehíkulo i di piesanan, i hasi ku esnan ku ta kometé e delitonan aki wòrdu investigá i prosesá?
- Merkado i komersio: Ken ta kumpra e piesanan robá? Kon nos por kontrolá negoshinan ku ta importá, bende i instalá piesanan di vehíkulo?
- Reintegrashon di hóben: Kon nos por yuda hóbennan ku ta kai den kriminalidat pa nan haña edukashon, formashon profeshonal i un oportunidat real riba merkado laboral
Den kuadro di esaki na nòmber di frakshon di MFK, mi kier felisitá minister di SAOW Sharetti America ku a inisiá e proyekto di Keda Konektá kaminda kasnan di famia sin awa i koriente lo wòrdu re konektá bek i tambe un oumentu pa esnan ku ta biba di un sosten finansiero di gobièrnu ku ta un di e posibel solushonnan pa kombatí pobresa i kriminalidat.
Minister Van heyndoorn ku ta trahando duru riba seguridat na nos skolnan i tambe pone alumnonan ku a wòrdu raya for di skol pa motibu di komportashon pa un otro oportunidat den enseñansa
Minister ing Charles Cooper ku ta sakando hopi pèrmit di konstrukshon i proyektonan di infrastruktura asfaltamentu kaminda hóbennan ta partisipando aktivamente den trabou.
Minister Pisas GMN di sektor Medio ambiente i Naturalesa ku a inisiá e proyekto ban limpia Kòrsou i ku nos a nota aki tambe ku hóbennan ta partisipando aktivamente den trabou.
Na minister Hustisia kaminda nos a tuma nota ku ladronisia a baha i tambe ku a kuminsá ku e akshon di blou riba kaya i ku polisnan ta solushonando diferente kaso di ladronisia i asesinato i tambe e trayekto pa re organista JJIC ku e programa pa hóbennan ku ta den rísiko pa kai den krímen ta kanando den su totalidat.
E análisis riba e tema aki no solamente ta kastigá, sino prevení
Nos tin un konseho di Raad Van Advies fecha 9 aprel 2024 ku ta un proposishon di kambio di lei e kambio di LeiWetboek van Strafrecht di Kòrsou pa asina imponé un kastigu mas severo pa sierto tipo di hòrtamentu o ladronisia, kaminda ku un di e konsehonan ta konsehá ku kastigu mas severo no ta garantisá ménos kriminalidat i den e kaso aki hòrtamentu o ladronisia, teniendo kuenta ku e Wes tin e responsabilidat pa evuala kada kaso, tendiendo na kuenta aki tambe e gravedat di e delito, e sirkunstansianan i e situashon di e persona ku a kometé delito.
Hopi biaha ta menshoná hóbennan komo esnan ku ta envolví den e tipo di kriminalidat aki i mester tene kuenta pa no generalisá ni pone tur hóben den e mesun kategoria.
Un hóben ku ta kometé un delito mester enfrentá konsekuensia di su aktonan. Pero, na mes momento, mester investigá kiko a hiba e hóben pa e kaminda ey.
Esaki ta nifiká invertí den:
Edukashon i formashon profeshonal.
Programa di re entrenamentu pa hóbennan ku a bandoná skol.
Oportunidat di praktiká i siña un ofishi.
Programa di empleo pa hóbennan ku ta den riesgo di kai den kriminalidat.
A Kompañamentu sosial i orientashon pa nan por regresá na komunidat.
Mi ta kere ku un polítika di seguridat mester tin dos banda, ku konsekuensia pa esnan ku ta kometé delito i oportunidat pa esnan ku tin posibilidat di kambia nan bida.
E problema di ladronisia tin tambe un banda ekonómiko
Aki mi ta haña bo opservashon tokante importadó i komersiante di vehíkulo i piesanan di Merka hopi relevante.
Mi ta sugerí e siguiente medidanan:
Registrashon di piesanan: Piesanan di vehíkulo di importashon i benta mester tin dokumentashon di orígen.
Registrashon di negoshi: Kontrolá garashinan, sloperijnan i negoshinan ku ta bende piesanan di outo.
Kontrol di importashon: Pidi dokumento di kompra, faktura i dokumento di importashon pa piesanan ku ta drenta Kòrsou.
Kontrol di VIN/chasis: Krea un sistema pa por registrá vehíkulonan i nan identidat.
Sanshon: Esnan ku ta kumpra of bende piesanan hòrta, sabiendo ku ta un akto ilegal, mester enfrentá konsekuensia penal, enbes di solamente persiguí e hóben ku ta bai hòrta e vehíkulo ?
PREGUNTANAN:
- Tokante e merkado di piesanan robá: Kon minister ta bai kontrolá importadó, negoshinan di vehíkulo, garashinan i negoshinan di piesanan di outo pa prevení benta di piesanan robá?
- Tokante responsabilidat: Tin un registrashon obligatorio di orígen di piesanan di outo ku ta wòrdu bende na Kòrsou?
- Tokante investigashon: Dikon no tin un sistema integral kaminda Polis, Douane, Keuringslokaal, Aseguradonan, Agensianan di benta di vehíkulo, Komersiantenan ku tin aber ku importashon i benta di piesa di vehíkulo pa kompartí informashon pa por identifiká e hendenan ku ta forma parti di e kadena di ladronisia di vehíkulo ?
- Tokante hóbennan: Ki programa konkreto tin pa hóbennan ku ta den riesgo di kai den kriminalidat, pa nan por haña formashon profeshonal, praktiká i trabou?
Tokante re integrashon: Kuantu hóben ku a pasa den sistema di hustisia a haña un oportunidat di empleo despues di nan rehabilitashon? I kuantu di nan a bolbe kai den kriminalidat?
- Tokante resultado:
Parlamento por haña un plan di akshon ku meta konkreto pa baha ladronisia di vehíkulo i kriminalidat hubenil, ku un evaluashon kada seis luna?
Un konseho pa ministerio públiko, pa ku kasonan di delitonan di ladronisia ku un gravedat haltu, manera den kaso hòrtamentu di piesa i vehíkulo, ladronisia di bestia i atrako riba turista, pa ta ma severo na momentu ku ta duna kastigu i desishonnan ku ta wòrdu tuma tambe pa loke ta trata libertat temporalmente pa kastigunan leve pa loke ta ladronisia i pa despues pa aserka bo pa bin sinta bo kastigu, mester eskala esaki bon.
Parlamento asina ki tin un bista hopi mas kla di e problema di ladronisia di vehíkulo i ku e punto sentral mester ta, no solamente kon nos ta para ladronisia di vehíkulo, sino kon nos ta kibra e kadena ekonómiko ku ta alimentá e kriminalidat i na mes momento duna nos hóbennan un futuro mihó.
Atentamente
Juniel R Carolina
Parlamentario MFK
Cell 5626501

