TUI ta selebrá e di 250.000 pasahero den aña 2025 riba ruta Kòrsou – Amsterdam

Kantidat rekòrt di buelonan
TUI ta alkansá e logro aki den un aña kaminda TUI fly a operá un kantidat rekòrt di buelonan pa Kòrsou. Durante e periodo di Pasku i fin di aña tin por lo menos 18 buelo di ida i buèlta entre Amsterdam i Kòrsou — e kantidat di mas haltu den e temporada aki. Nunka promé un organisashon di biahe a trese asina tantu bishitante pa Kòrsou den solamente un aña.

Mas ampliashon di buelo den 2026
E demanda grandi pa e destino ta reflehá tambe den TUI su planan di kresementu. Den 2026 TUI fly lo amplia kapasidat ku buelonan adishonal den luna di aprel i mei, riba djaluna i djadumingu. Di e forma aki e total lo bira 15 buelo pa siman entre Amsterdam i Kòrsou. E ampliashon aki ta krea kapasidat aéreo adishonal tambe pa Boneiru, Aruba i Punta Cana.

Arjan Kers, Managing Director di TUI Hulanda i Bélgika: “Den 2025 nos a bula un kantidat rekòrt di e trayekto entre Amsterdam i Kòrsou. Den e 20 añanan ku nos ta bula pa Kòrsou, nunka promé nos a transportá asina tantu pasahero den un aña pa e bunita isla aki. Ku esaki, TUI a logra un rekòrt. Duna bon biní na e di 250.000 pasahero den un aña ta un prueba bunita di e koperashon largu i éksitoso entre Kòrsou i TUI fly.”

E konekshon aéreo frekuente i konfiabel ku Hulanda ta di gran importansia pa turismo, ekonomia i e lasonan familiar entre Kòrsou i Europa. TUI lo sigui traha riba mas kresementu, kalidat i konekshon.