Eric’s ATV Adventures ta brinda transparensia tokante e situashon aktual i ta reakshoná riba informenan tokante di su lokalidat
Eric’s ATV Adventures ta brinda transparensia tokante e situashon aktual i ta reakshoná riba informenan tokante di su lokalidat
Willemstad – Despues di desaroyonan resien rondó di e lokalidat aktual di Eric’s ATV Adventures (Eric’s ATVs) i e informenan relashoná ku esaki, e kompania ta konsiderá nesesario pa duna konteksto i splika su posishon kuidadosamente. E kompania ta limitá su mes na e aspektonan profeshonal i lo no duna komentario riba e deklarashonnan partikularmente ofensivo tokante e persona i karakter di Eric Raphaëla, hasí na un momentu i ku un tono no apropiá.
Eric Raphaëla, kende a konstruí e kompania aki su mes ta den hòspital rekuperando i no por duna komentario públikamente na e momentunan aki. Nos ta gradisido pa tur e mensahenan di pronto rekuperashon i ekspreshonnan di sosten di komunidat i lo hasi esfuerso pa presentá Eric su puntonan di bista na e mihó manera posibel pa medio di e komunikado di prensa aki.
Informashon general i posishon di e kompania
Eric’s ATV’s a operá for di su lokalidat aktual pa mas ku 20 aña, di forma konsekutivo. Den tur e añanan ei, e kompania nunka no a skohe konsientemente pa ta deskuidadoso òf pa ignorá regla. Al kontrario, Eric’s ATV’s a purba na mas ku un okashon i por eskrito pa atkirí e tereno formalmente riba nòmber di e kompania, pa medio di petishonnan na e outoridatnan kompetente.
Den tur e añanan ei, gobièrnu nunka no a indiká ku esaki no ta posibel òf ku e kompania lo mester bandoná e sitio. Ku otro palabra, niun desishon definitivo ku un empresario por prepará su mes p’e, pero un temporada di 20 aña wardando riba un kontesta.
For di 2003, Eric a buska aktivamente un tereno (erfpacht) via gobièrnu. Eric’s ATV’s a keda fundá na 2004 i tabata buskando un lokalidat nobo urgentemente na 2006. Domeinbeheer a ofresé dos lokalidat e tempu ei: un tereno na Piscadera i e tereno aktual, ku a skohe p’e konsientemente. Ora a skohe e tereno aktual e tempu ei, Domeinbeheer a indiká ku pronto lo prepará e dokumentonan nesesario i ku, si un dia mester yega na konstruí un kaya, ku ya a tene kuenta ku esaki kaba i ku e kaya aki (“wegtrace”) lo sigui e kaminda di tera eksistente, pasando banda di e sitio kaminda Eric’s ATV’s ta lokalisá (manera deskribí den e Plan Maestro di Seru Spañó). Esaki ta bisto for di e pinturanan i numbernan di fail optené di Domeinbeheer. Esakinan tabata señalnan sufisiente pa Eric sigui konstruí i invertí den kresementu di su negoshi.
Apesar di vários petishon, inkluyendo un petishon por eskrito na aña 2012 dirigí na Domeinbeheer i e Minister di VVRP di e tempu ei, Minister Cooper, e proseso aki nunka no a finalisá, i nunka gobièrnu no a indiká eksplísitamente ku e kompania lo mester a bandoná e sitio. E petishon por eskrito entregá na 2007 tampoko no a haña kontesta.
Di petishon pa desokupashon
Na mart 2025, e desaroyadó di proyekto Stonefield, huntu ku gobièrnu, a presentá un demanda sivil kontra Eric i e Eric’s ATV Adventures. Dia 30 di aprel 2025, e kompania a risibí un desishon di gobièrnu ku ta outorisá kitamentu di edifisionan na e sitio, pasobra, segun gobièrnu, esakinan no tabata permití. A presentá un opheshon na tempu kontra di e desishon aki. Debí na komunikashon konfliktivo tokante fechanan límite, e opheshon aki, i tambe e kaso den Korte ku a sigui, a keda deklará inatmisibel. Pues nunka un wes no a evaluá argumentonan di e kompania pa loke ta trata kontenido di e kaso.
Na dezèmber 2025, despues ku un tim di “handhaving” a kuminsá hasi e edifisio na e lokalidat bashí (“ontruimen”) i kaminda a deskonektá awa i koriente di antemano, Eric’s ATV’s a pidi wes pa tempu adishonal, pa medio di un huisio sumario. E petishon aki tabata destiná pa permití e kompania mes desokupá e edifisio i muda di forma kuidadoso, sigur i responsabel, ku rèspèt pa hende, ekipo i kontinuidat di e kompania.
Reunion ku ministernan i opshonnan
Durante e reunion ku Minister di Tráfiko, Transporte i Planifikashon Urbano i Promé Minister riba 5 di dezèmber 2025, i den vários kontakto despues di e fecha aki, a papia riba vários solushon. Esakinan tabata faktibel pa e kompania solamente den kombinashon ku un tereno nobo riba nòmber di Eric’s ATV Adventures i bou di kondishonnan adishonal. Te ku awe no a risibí ningun konfirmashon por eskrito di e opshonnan aki.
E opshonnan ta:
Opshon 1: Uzo temporal di un lokalidat ku un desaroyadó di proyekto a ofresé, bou di kondishonnan ku a splika ku boka, inkluyendo un kontribushon pa gastunan di mudansa, kitando gastunan pa hasi e edifisio bashí i gastunan pa kita e edifisio for di riba e tereno.
Opshon 2: Hürmentu di un òf dos unidat den un proyekto, ku ainda mester kaba desaroyá na Bon Biní Resort, sin espasio pa un garashi òf lugá pa warda e ATV nan.
Opshon 3: Hürmentu di un òf dos unidat ku ainda mester desaroyá na Marie Pampoen, tambe sin garashi òf lugá pa warda e ATV nan.
Ku òf sin:
Opshon 4: Un sitio alternativo otro kaminda, kaminda e tereno lo por ta riba nòmber di Eric’s ATV Adventures.
Deklarashonnan públiko i mensahenan di WhatsApp
Eric’s ATV’s mes no a hasi ningun deklarashon públiko via medionan sosial tokante e situashon aki. Durante un transmishon bibu via Facebook, Minister di Tráfiko, Transporte i Planifikashon Urbano a mustra mensahenan di WhatsApp na prensa i empleadonan di Eric’s ATV’s. E mensahenan aki a keda presentá for di konteksto, komo ku e kòmbersashon tabata konsistí di hopi mas mensahe i kondishon. Ademas, e opshonnan menshoná anteriormente no a keda spliká korektamente i no a ni menshoná opshon 4.
E posishon final ta ku opshon 1 tabata i ta un opshon viabel, pero solamente den kombinashon ku opshon 4, atkerí un tereno nobo riba nòmber di e kompania, i bou di kondishonnan adishonal. E konteksto aki ta esensial pa un representashon eksakto di e situashon. No a yega na un desishon, no solamente pasobra no tabatin nada por eskrito, pero tambe pa motibu ku despues di e reunion tabatin vários kòmbersashon telefóniko ku e desaroyadó di proyekto.
Status aktual
Eric’s ATVs ta wardando desishon di wes den e huisio sumario andando. E meta prinsipal ta pa optené sufisiente tempu pa realisá un mudansa kuidadoso.
E kaso den Korte ku e desaroyadó di proyekto, huntu ku Pais Kòrsou, a entamá kontra Eric’s ATV’s na komienso di 2025 tambe ta andando ainda.
Eric’s ATVs no ta pidi un trato preferensial, pero un periodo rasonabel i un solushon ku ta honra binti aña di negoshi lokal, empleo i kontribushon na e produkto turístiko di Kòrsou. E kompania ta keda dispuesto na yuda pensa di forma konstruktivo, pero no por operá a base di insertidumbre òf kompromisonan ku no ta riba papel.
Na tur persona ku ta puntra nan mes dikon Eric’s ATV’s no ta entregá: pasó no ta trata aki di djis un lokalidat. Ta trata di hustisia.
