Fundashon Birgen di Rosario Akuerdo di koperashon entre Stichting Johannes Bosco i Fundashon Birgen di Rosario!

Fundashon Birgen di Rosario

Akuerdo di koperashon entre Stichting Johannes Bosco i Fundashon Birgen di Rosario!
Na Kòrsou nos por traha huntu, basta nos ke! Fundashon Birgen di Rosario (Birgen), ku ta e instansia di kuido mas grandi na Kòrsou, tin 5 lokalidat pa kuido, akohida i estadia pa e grandinan di Kòrsou. Ta sosodé ku dos di e lokalidatnan akí tabata tin mester di mantenshon grandi atrasá urgente, pa kua motibo mester a muda e habitantenan. Den e situashon akí, Stichting Johannes Bosco a duna un man pa salva e situashon. Nan ta disponé di e paviljoennan na Brakkeput Ariba nr. 3, kaminda antes Stichting Kinderoorden Brakkeput tabata ubiká. Un lokalidat presioso, kaminda aktualmente tin 52 hende grandi di Birgen ta biba di forma temporal, kaminda nan ta sinti nan mes dushi i liber. Stichting Johannes Bosco a sera un kontrato di hür ku Birgen.
Dia 6 di febrüari 2026 Birgen a organisá un tremendo Jump Inn den e sala multifunshonal di e kompleho ariba menshoná. Tabata tin mas habitante di e otro lokalidatnan di Birgen presente. En total 150 hende grandi a eksperensiá e aktividat akí. Durante e manifestashon kultural akí, ku tabata tin komo tema “Blue Wave”, a hasi uzo di e oportunidat pa di un forma festivo duna publisidat na e akuerdo di koperashon. Durante e okashon akí e direktor di Stichting Johannes Bosco, Marcel Dennert den kompania di Tanja Cicilia di dicho organisashon, a entregá di forma simbóliko e yabi di e kompleho na direktor di Fundashon Birgen di Rosario, Indra Rossen-Lucasius.