𝐌𝐢𝐧𝐢𝐬𝐭𝐞𝐫 𝐁𝐨𝐞𝐤𝐡𝐨𝐮𝐝𝐭 𝐚 𝐟𝐢𝐫𝐦𝐚 𝐩è𝐫𝐦𝐢𝐭 𝐝𝐢 𝐅𝐊𝐀𝐊

Willemstad, 2 di mart 2026 – Minister Boekhoudt (GMN) a firma awe e dekreto ministerial pa prolongá e pèrmit di Fundashon Kuido di Ambulans Kòrsou (FKAK) te ku 31 di desèmber 2026.

Ku e desishon aki, gobièrnu ta garantisá e kontinuidad di kuido di ambulans, mientras ta sigui traha duru riba un reforma struktural i profeshonalisashon di e sektor.

A designá aña 2026 komo un aña di transishon. Den e periodo aki, kuido di ambulans lo wòrdu optimalisá mas aleu i prepará pa e transishon pa un entidat nobo i profeshonal bou di Ministerio di GMN entrante prome di yanüari 2027.

E kuido di ambulans lo keda disponibel 24 ora pa dia, 7 dia pa siman for di tres post na Kòrsou, ku mínimo kuater ambulans operashonal i personal kualifiká konforme e rekisitonan legal.

Den kuadro di e transishon pa e entidat di implementashon nobo, den konsulta kuidadoso ku personal i nan representashon, lo traha riba un inbedding duradero i legalmente responsabel di e organisashon i su empleadonan entrante 1 di yanüari 2027.

Ku e prolongashon aki, gobièrnu ta ehekutá e desishon tumá anteriormente pa modernisá e kuido di ambulans strukturalmente, organisá esaki di un manera mas transparente i laga esaki kuadra mihó ku e nesesidat di kuido di e komunidat.

E próksimo lunanan lo monitoreá e progreso di e trayekto di serka.