Moneda dediká na 10 aña di struktura estatal nobo

Moneda dediká na 10 aña di struktura estatal nobo

Willemstad/Philipsburg –Na okashon di e désimo aniversario di e struktura estatal nobo di
10-10-10, Centrale Bank van Curaçao en Sint Maarten (CBCS), ta emití un moneda
konmemorativo spesial den sirkulashon.
Den un forma ofisial CBCS a ofresé e moneda aki na e promé ministernan i e ministernan
di Finansas di Kòrsou i Sint Maarten. Na Kòrsou e moneda a keda ofresé pa presidente di
CBCS Richard Doornbosch i na Sint Maarten pa gerente di ofisina di CBCS na Sint Maarten
Raquel Lo-Fo-Wong.
E moneda di sirkulashon tin un balor nominal di NAf 5 ku na parti dilanti e number romano
“X”, ku eiden e teksto “OCTOBER 10, 2010-2020”. Na banda robes di e X tin e imágen
kolorido di e bandera di Kòrsou i na banda drechi e imágen na kolo di e bandera di Sint
Maarten. Ariba tin skirbí “PAIS KÒRSOU” i respektivamente “COUNTRY OF SINT
MAARTEN”. Abou tin e siluetanan di e paisnan Kòrsou i Sint Maarten ilustrá. Na e otro
banda di e moneda tin e eskudo di e pais anterior Antia Hulandes ku menshon di e balor di
“5G” i e aña “2020”.
E moneda aki, di kual 100.000 unidat a keda produsí, lo wòrdu poné den sirkulashon riba
dia 9 di òktober pa medio di bankonan komersial na Kòrsou i Sint Maarten. Spesialmente
pa kolekshonadónan, CBCS tin un kantidat limitá di e monedanan aki na ròl di 20 moneda
lorá den un emboltura diseñá úniko na rason di NAf 100. E ròlnan aki ta solamente
disponibel na CBCS.
Willemstad, 7 di òktober 2020
CENTRALE BANK VAN CURACAO EN SINT MAARTEN
Riba potrèt CBCS Munt SXM di robes pa drechi: sra. Raquel Lo-Fo-Wong (CBCS), sr. Ardwell Irion
(Minister di Finansas), sra. Silveria Jacobs (Promé Minister)
Riba potrèt CBCS Munt CUR di robes pa drechi: sr. Kenneth Gijsbertha (Minister di Finansas),
sr. Eugene Rhuggenaath (Promé Minister), sr. Richard Doornbosch (Presidente di CBCS

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: