Interne Bijstand Team (IBT) di SDKK a keda fortalesé ku 9 miembro nobo i ekiponan moderno

Interne Bijstand Team (IBT) di SDKK a keda fortalesé ku 9 miembro nobo i ekiponan moderno

A invertí un total di mei mion florin

Willemstad – Djamars 10 di febrüari 2026 a tuma lugá un momento importante pa Sentro di Detenshon i Korekshon Kòrsou (SDKK), kaminda Minister di Hustisia, mr. Shalten Hato a hasi entrega ofisial di 9 Ministeriële Beschikking na miembronan nobo di Interne Bijstand Team (IBT). Ku esaki, e tim spesial a sigui fortalesé su kapasidat operashonal i su ròl krusial den mantené òrdu i seguridat den e instituto.

IBT ta un grupo spesial di prizòn ku tin komo tarea prinsipal pone òrdu i garantisá seguridat na momento di asistensia, disturbio òf kalamidat. E tim ta traha semper den ekipo, ku bon kordinashon i disipliná, pa logra e meta final: un ambiente sigur pa personal i detenidonan.

Aktualmente, IBT ta konsistí di 17 miembro aktivo i 6 Komandante di IBT, tur ku hopi aña di eksperensia i kompromiso den situashonnan operashonal i di emergensia. Ku e atkisishon di 9 miembro nobo, ku a kompletá un trayekto intensivo di formashon i preparashon, e kapasidat di e tim a keda ampliá i reforsá.

Ademas di fortalesé e kapasidat humano, Ministerio di Hustisia a pone fondonan disponibel pa mehorá tur ekipo di IBT. Entre otro, a invertí den vehíkulonan nobo pa transpòrt, pòrtofon i earpiece spesial pa komunikashon efektivo, i tambe a hasi entrega ofisial di nan tas di material di trabou (uitrusting). Durante e trayekto a asistí ku mei mion florin pa por a kumpra 40 unifòrm, 40 gasmaskers, vèst, shields, sapatunan spesial, wapenstok i diferente otro artíkulonan mas ku mester pa e tim. Huntu ku e invershon aki, a kumpra tambe 2 SUV-RAV ku e personal lo usa diariamente pa por ehersé trabounan den SDKK. Falta ainda vèst nan antibala ku ya tin fondonan disponibel pone i ku ta den proseso pa ser kumpra pa e tim por ta kompletu ekipá. Ku esaki, despues di hopi aña, IBT lo ta kompletamente ekipá i uniformá komo tim spesial den prizòn.

Minister di Hustisia, mr. Shalten Hato a mustra su apresio profundo na tur miembronan di IBT pa nan servisio, disponibilidat i dedikashon kontinuo pa kumpli ku nan responsabilidatnan. Tambe a ekspresá su gradisimentu na Gerensia di SDKK,i na koleganan di Ministerio di Hustisia ku a fasilitá e realisashon di e trayekto aki.

Ku e paso aki, Ministerio di Hustisia ta sigui invertí den profeshonalisashon, seguridat i pa fortalesementu struktural den personal na SDKK.

Fin di komunikado