Prome Minister Gilmar Pik Pisas 𝐏𝐫𝐨𝐠𝐫𝐚𝐦𝐚 𝐝𝐢 𝐆𝐨𝐛𝐞𝐫𝐧𝐚𝐬𝐡𝐨𝐧 𝟐𝟎𝟐𝟓–𝟐𝟎𝟐𝟗

Djaweps, 19 di febrüari 2026 durante e rueda di prensa, Gabinete Pisas III a presentá nan Programa di Gobernashon 2025–2029, ku ta duna un direkshon kla pa e próksimo kuater aña.

Kasi tur minister tabata presente. Minister van Heydoorn i Minister Middelhof no por a asistí, pero e logronan realisá i puntonan di enfoke di nan ministerio a wòrdu presentá dor di nan koleganan den union i responsabilidat kolektivo. Nan secretaris-general tabata tei presente pa asistí na momento di pregunta di prensa.

Den kuadro di implementashon di e Programa di Gobernashon 2025–2029, Gobièrnu ta palabrá di forma kla meta i logronan ku mester wòrdu alkansá. Nos lo monitoriá e progreso kada kuartal, midi loke ta funshoná i hasi ahustenan kaminda ta nesesario pa garantisá efektividat i impakto real.

Un sistema struktural i práktiko lo permití Gobièrnu wak resultadonan di manera transparente i responsabel. Supervishon lo kuminsá den transkurso di aña, ku ‘update’ regular riba loke a logra, pa asina mantené pueblo informá.