Parlamento di Kòrsou Di dos dia di IPKO na Aruba enfoká riba konektividat aéreo, seguridat sibernétiko, e reto di behes i adaptashon di klima.

Oranjestad, 20 di febrüari 2026, Kontinuashon di Reunionnan Interparlamentario (IPKO) na Aruba, ku enfoke riba desaroyo di konektividat aéreo (“Aruba Gateway 2030”), konsientisashon riba Cybersecurity, e reto di behes (vergrijzing) i adaptashon di klima.

E dia a kuminsá ku un un presentashon tokante e desaroyonan grandi na aeropuerto di Aruba bou di e título “Air Service Development: Aruba Gateway 2030”, ku mira riba e kantidat kresiente di pasahero. Siguí ku un bishita di trabou na e aeropuerto mes (AAA) pa e miembronan di e delegashonnan por a haña un bista di e proyektonan di ekspanshon i modernisashon.

Mèrdia a kontinuá ku presentashon i deliberashon ku Veiligheidsdienst Aruba (VDA) riba ‘Cybersecurity’.

Despues a sigui ku e tema di behes (vergrijzing). Representante di Directie Ouderen Zaken a kompartí informashon riba e reto di e poblashon ku ta birando grandi.

A konkluí e di dos dia ku un presentashon riba adaptashon na kambio di klima dor di un representante di ‘Bos di hóbennan karibense den Reino’.

Mañan 21 di febrüari 2026, ta e último dia di IPKO, kaminda lo aprobá i firma di e Lista di Palabrashonnan, pa despues terminá ku un konferensia di prensa.