Tenshon entre piskadónan i operadónan di jèt ski na Playa Sta. Cruz
Tenshon entre piskadónan i operadónan di jèt ski na Playa Sta. Cruz
Willemstad – Pa algún dia kaba tin sierto tenshon entre piskadónan na Playa Sta. Cruz i operadónan ku ta hür jèt ski (sea-doo) ku kliente. Na diferente okashon Ministerio di GMN a reuní ku e piskadónan i operadónan di jèt ski pa yega na un solushon. E problema prinsipal ta ku e piskadónan ta di opinion ku e jèt skinan ta sali i drenta playa ku velosidat haltu i ta spanta e masbangunan i e manchanan di masbangu. Konsekuentemente e piskánan ta drenta den un estado di pániko kual ta hasi kasi imposibel pa piska esakinan.
E velosidat haltu di e jèt skinan den área di Sta. Cruz tambe ta kousa ola i e olanan aki tin komo konsekuensia ku e botonan di piskadó ta dal den e wafnan (i/ òf dal den otro) i sufri daño. Djaweps mainta 19 di febrüari Ministerio di GMN a reuní na Playa Sta. Cruz ku e piskadónan i doñonan di kompanianan ku ta hür jèt ski. Kuerpo Polisial tambe tabat’ei presente i por a yega na algun palabrashon.
E operadónan di jèt ski lo muda e kabuya ku e jèt ski ta mará na dje pa e área keda disponibel pa piskadónan di masbangu di manera ku e no ta obstakulá e reda tampko nan boto. E kompanianan lo sòru pa tin un persona presente durante di dia pa wak ku tur nan trahadónan i turistanan ta mantené nan mes na regla.
Tin tambe un problema ku e slipway i Ministerio di GMN mester drecha esaki di manera ku ta bira mas fásil pa baha boto. E piskadónan tambe a indiká ku nan ta deseá pa no por baha boto den e haf di piskadó. A pidi pa GMN pone barankanan di tal manera ku no por baha boto tampoko jèt ski mas den e haf di piskadó, i tur hende usa e slip way. Además e piskadónan ta deseá pa GMN pone algun baranka dilanti di e área di palunan di mangrove p’asina vihíkulo motorisá no drenta mas bou di e palunan.
Ku e kambionan i ahustenan aki por yega na un balansa entre uso tradishonal di e Playa di Sta. Cruz manera piskamentu i aktividatnan ekonómiko. Aktualmente, ku e kresementu di e sektor turístiko, e playanan públiko ta wòrdu hopi bishitá pa ámbos turista i hendenan lokal. Gobièrnu ta hasi un apelashon riba komunidat pa ora hasi uzo di e playa, no kousa molèster i/ òf iritashon pa otro i pa tene kuenta ku otro usuarionan di playa.
