‘The Curaçao Business Cruise Trade Mission 2026’ a start

Willemstad – Riba djasabra 21 di febrüari, un delegashon ku ta konsistí di shete empresa lokal, kompañá pa representantenan di Ministerio di Desaroyo Ekonómiko (MEO), CINEX (Curaçao Investment & Export Promotion Agency), CTB (Curaçao Tourist Board) i CMA (Curaçao Manufacturers Association) a subi e krusero Renaissance pa partisipá na Curaçao Business Cruise Trade Mission 2026. E mishon aki, organisá pa VBC, ta representá un esfuerso kolaborativo signifikativo pa promové interesnan ekonómiko di Kòrsou i stimulá oportunidatnan di negoshi den e region Karibe.

Partisipashon di e delegashon ta suprayá e kompromiso di tantu sektor públiko komo e sektor privá na Kòrsou pa partisipá aktivamente den inisiativanan di komèrsio i invershon regional. Pa medio di e mishon aki, e grupo tin komo meta eksplorá merkadonan nobo, establesé konekshonnan stratégiko i kontribuí na e metanan mas amplio di kresementu ekonómiko i integrashon regional.

E mishon ta reuní empresanan establesé na Kòrsou pa fortalesé komèrsio regional, invershon i kooperashon na ocho destinashon di Karibe. E programa ta inkluí seshonnan struktura di ‘B2B matchmaking’, reunionnan gubernamental, diálogonan sektoral i eventonan di konekshon diseñá pa krea asosiashonnan sostenibel di negoshi.

Ademas, e mishon tin komo meta promové Kòrsou komo un ‘business hub’ konfiabel i bon posishoná i stimulá diversifikashon di eksportashon den sektor prioritario. Pa medio di diálogo direkto entre partnernan na nivel gubernamental, e inisiativa ta sostené tambe eksplorashon di e kuadro formal di kooperashon den áreanan manera fasilitashon di komèrsio, promoshon di invershon, kolaborashon turístiko i inovashon.

Un ohpetivo prinsipal di e mishon ta sostené internalisashon di empresanan chikí i mediano (SME) di Kòrsou, brindando nan oportunidatnan práktiko pa haña akseso na merkadonan i fasilitá konekshonnan stratégiko ku stakeholdernan regional.

En general, e mishon ta reflehá Kòrsou su kompromiso pa kresementu ekonómiko sostenibel, integrashon regional i fortalesimentu di kompetitividat di su sektor privá den Karibe.