Lansamentu di Liesella Ministry i Liesella su kansion nobo “ Na Bo enkargo” tabata un eksito.
Djamars 24 di Februari 2026, Harbour Restaurant na Otrobanda tabata e esenario di e lansamentu ofisial di Liesella Ministry. Un ministerio musikal nobo ku ta enfoká riba trese speransa, fe i transformashon pa medio di kanto i testimonio.
Invitadonan, representante di prensa i e team di Liesella Ministry a reuní pa presensiá un programa inspirador kaminda a presentá formalmente e vishon, mishon i metanan di e ministerio fundá pa Liesella Geertruida Thomas.
Den su presentashon, Liesella a komparti e inspirashon pa a lansa e ministerio aki, ekspresando ku Liesella Ministry a nase for di un yamana profundo pa motivá, konsola i inspirá hende, i pa konsientisá riba e importansia di tin un relashon personal i real ku Dios pa medio di kanto.
Durante e anochi, a presentá e plan di impakto di e ministerio, ku ta inkluí ministerio di konsuelo pa pashentnan na hospital, instansianan di kuido i durante entieronan. Tambe a resalta e intenshon pa sigui organisá konsiertonan manera “Ban habri ana ku Dios”, ku ta enfoká riba motivashon spiritual i guia pa enfrenta desafionan di bida.
Un momento importante di e programa tabata e revelashon ofisial di e website http://www.liesellaministry.com, ku a wordu presentá “live” riba pantaya. E plataforma digital lo sirbi komo un medio pa alkansá un publiko mas amplio i forma un komunidat online kaminda mensahenan di speransa i reflekshon lo wordu kompartí regularmente.
E anochi tambe a inkluí e presentashon di e banda musikal di Liesella Ministry i e team ku lo sostené e ministerio den su desaroyo. E publiko a disfrutá di e lansamentu “live” di e kansion nobo titulá “Na Bo enkargo”, ku a marka un momentu emoshonal i signifikativo durante e evento.
Ku e lansamentu aki, Liesella Ministry ofisialmente a kuminsá su trayekto komo un ministerio ku ta aspirá pa usa musika komo instrumento di inspirashon i konekshon ku Dios.
Pa mas informashon, interesadonan por bishitá http://www.liesellaministry.com òf sigui Liesella Ministry riba media sosial.
