Perseveransha, kurashi, konfiansa den nos mes mester ta prioridat riba agènda pa logra un emansipashon berdadero di hende muhé 

 

Perseveransha, kurashi, konfiansa den nos mes mester ta prioridat riba agènda pa logra un emansipashon berdadero di hende muhé 

Fundashon Museo Tula (FMT) ta yama tur hende muhé, for di e chikitin ku a nase resientemente, te e adulto mayó; pabien ku boso dia. Nos ta spera ku fuera di ku e ta un dia pa gosa di dje, e ta mesora tambe un dia di reflekshon di ken nos ta i kon nos ta yuda otro pa dal pasonan kolektivo pa nos mes, nos yunan i ñetunan por disfrutá di dje.

• Laga e dia akí inspirá bo pa kere den bo mes mas i mas i konfia tambe den bo mes mas i mas. 
• Tin e kurashi pa bringa pa bo derechinan. 
• Sa ku nos tur a nase ku diferente talento. Bo tambe. Bai pa ekselensia den uso di bo talentonan 
• Histórikamente hende muhé a demostrá den nan bida diario: kuido pa otro, pa mucha, hende grandi, esun ku ta malu na kama i kuido di naturalesa.
• Histórikamente ta hende muhé a bringa pa pas i harmonia na kas, den e pais i den mundu. Esei mester keda e mishon di kada un di nos. 
• Histórikamente ta hende muhé a hunga un ròl importante pa bringa pa derechinan humano, pa nos por konta den sosiedat, entre otro pa tur hende haña e derechi di voto i den solidaridat ku otro pueblonan den mundu. 

Riba lomba di nos ansestronan nos ta sigui krea suidadanonan aktivo, partisipativo i konsiente.  

Laga nos saka lès awe for di ehèmpelnan di dos ansestro hende muhé di tempu di sklabitut, ku ta ehèmpel pa e lucha di libertat, igualdat i solidaridat. 

• Deanna, ku tabata forma parti di e dos mil luchadónan pa libertat, huntu ku Tula. E luchadó akí ta siña nos balor di kurashi, pa bringa pa loke bo tin derechi riba dje. 
• Flora, ku a biba na  aña 1841, tabata un mucha muhé di diesshete aña ku a usa su astusia, su konosementu, pa yuda diesocho hende, tur hende hòmber (hende hòmber sklabisá i hende hòmber liber), pa hui for di Kòrsou i establesé nan  mes na Hispañola/Haiti. 
• Ta muhénan a move shelu i tera, pa krea sosiedatnan liber pa un i tur. Bo a tèst bo amor, perseveransha, bo kurashi i konfiansa  den bo mes, pa logra bo mishon i vishon pa bo sosiedat? Ban krea un mihó mañan pa nos mes, nos yunan i nos ñetunan. Un biaha mas pabien!

Jeanne Henriquez 

Fundashon Museo Tula