KUERPO POLISIAL KORSOU

KOMUNIKADO DI PRENSA                                      

071/2026

 8 mart 2026

 

Akshon ‘Entrega bo arma i skapa un alma’

  

Resientemente Kuerponan Polisial di Karibe Hulandes a publika ku nan a uni forsa, pa asina ei duna oportunidat na siudadanonan ku ta den poseshon di un of mas arma di kandela ilegal, pa entrega esaki(nan) boluntariamente sin ku e tin konsekuensia penal.

Meta di e akshon aki ta, pa redusi violensia ku arma di kandela riba e diferente teritorionan i garantisa komunidatnan liber di arma di kandela ilegal.

Pa Korsou, e akshon di entrega di arma aki ta kuminsa ofisialmente djaluna dia 16 di mart proksimo.

Entrante di e fecha ei, pa un periodo limita, durante di siman, for di djaluna te ku djabierne entre 08.00’or i 15.00’or, tur persona ku ta dispone di un arma di kandela ilegal (pues pa kua nan no tin un permit p’e), por entrega esaki na ofisina di Ministerio Publiko (enfrente di e edifisio di antes Cinelandia).

E personal di seguridat na porta lo guia bo pa e ofisina na unda e entrega ta tuma luga.

Un petishon ta bai na tur persona ku ta bin entrega un arma di kandela, pa soru pa esaki ta bon paketa di un manera seif, di manera ku e no por wordu usa (aktiva) mesora.

Depende di e tipo di arma i su funshonalidat, e persona ku entrega e arma ta risibi un montante inmediatamente ku por varia entre XCG 300,- pa XCG 750,-. E montante aki ta un insentivo pa motiva siudadanonan pa entrega nan arma di kandela ilegal i no un forma den kua hustisia ta kumpra e arma serka e siudadano.

Pa por responsabilisa e echo ku ta duna un montante di sen na momentu di entrega un arma, esun ku ta entreg’e mester identifika su mes i firma pa e montante ku eta risibi.

Nos ta bolbe asentua, ku ningun persona ku denter di e periodo indika aki bin entrega un arma di kandela ilegal, lo NO keda persigui penalmente pa poseshon ilegal di e arma di kandela ku el a entrega.

Aparte di arma di kandela ilegal, ta bai e suplika tambe pa entrega munishonnan, kualnan tambe ta kontra di lei pa ta dispone di esakinan sin permit.

Tantu Kuerpo Polisial Korsou komo Ministerio Publiko pa media die akshon aki ta enkurasha tur persona ku tin un arma di kandela ilegal, pa hasi uso di e oportunidat aki, pa deshasf di e arma.

Tene kuenta ku si bo laga e chens aki pasa bai i bo no entreg’e, nos mes ta bin busk’e.

E diferensia ta e ora ei, ku bo tambe tin ku bai.

Entregando bo arma, bo ta libra bo mes di problema ku hustisia i posiblemente skapa un alma.