𝐖𝐒𝐂𝐂 𝐭𝐚 𝐬𝐞𝐥𝐞𝐛𝐫𝐚́ 𝐃𝐢𝐚 𝐈𝐧𝐭𝐞𝐫𝐧𝐚𝐬𝐡𝐨𝐧𝐚𝐥 𝐝𝐢 𝐇𝐞𝐧𝐝𝐞 𝐌𝐮𝐡𝐞́ 𝐤𝐮 𝐞𝐯𝐞𝐧𝐭𝐨 𝐢𝐧𝐬𝐩𝐢𝐫𝐚𝐭𝐢𝐯𝐨.

Djadumingu mainta, 8 di Mart, direktiva di WoMen’s Steering Committee Curaçao (WSCC) a tene un evento na Dreams Hotel and Resort, pa selebrá Dia Internashonal di Hende Muhé, huntu ku representantentenan di organisashonnan afiliá na WSCC, i invitadonan spesial.

Despues di palabra di bon biní di presidente di WSCC, sra.Mirieta Lourens-de Lanoy, a presentá e himno nobo di e organisashon kantá pa artista lokal ‘Lady Su’ i a sigui e programa ku un desayuno.

Promé, i durante di e desayuno, Carlos Salsbach a deleitá esnan presente ku su músika i kanto.

E programa a kontinuá ku diskursonan hopi inspirativo pa kuater orador.

E promé, Mariëlla Olaria-Maduro, a elaborá riba e importansia di invertí den e hende muhé, pa logra mas empoderashon di e hende muhé, ku lo tin komo resultado ku mas hende muhé por aportá den posishonnan di liderazgo.

“Ora proveë e hende muhé akseso na oportunidatnan hustu pa e desaroyá su talento i abilidatnan, komunidat den su totalidat lo benefisiá di esaki.”

Despues a sigui un presentashon di Pédzi Flores-Girigori kende a trata entre otro e tema di igualdat di género i su relashon ku desaroyo sostenibel (SDG’s).

Ela mustra ku na Kòrsou ainda tin desbalanse di género, I a enfatisá riba e ròl di e hende muhée den kuido di medioambiente I kambio di klima.

E di tres orador, Reina Heyden-Joe, na su turno. a enfoká riba kon importante ta pa presentá i proyektá bo mes komo profeshonal a base di konosementu di regla den kua bo ta radia klase ku por habri portanan pa bo i brindá bo mas oportunidat pa e hende muhé.

E tambe, meskos ku e otro oradornan, a mustra riba e importansia pa e hende muhé desaroyá su konosementu den un proseso kontinuo pa sigui krese komo profeshonal.

E último orador, Gwendeline (Gwen) Leuteria, a enfatisá ku e hende muhé su ròl den lanta e yu hòmber ta esensial.

“Komo hende muhé nos tin e poder pa konstruí i destruí.

Mas nos eduká nos mes riba e area sosial i emoshonal nos por konstruí i lanta nos yu hòmbernan ku mas konsiderashon ku hende muhé ku por evitá violensia.

Alabes Gwen a informá kiko a motiv’é pa lanta e MpowerMEN Foundation Curaçao.

“Den mi trabou komo profeshonal i den ámbito sosial, mi a tuma nota ku riba hopi tereno e ser maskulino ta kana atras.

Tambe ta notabel ku te ainda hopi mucha ta lanta sin un tata den kas i asta ku hóbennan ku ta kue mal kaminda ta pa falta di amor i atenshon di nan mama.

Ku e fundashon, den kolaborashon ku otronan, nos ta traha i enfoká riba e aspektonan pa krea un espasio “safe” pa kresementu basá riba 4 pilar kual ta; individual, famia, trabou i komunidat”.

Mei-mei di e presentashonnan inspirativo di e profeshonalnan menshoná aki riba, pastor Curtis Meris, kende ta tata spiritual di WSCC, a alimentá e aspekto spiritual ku un tremendo presentashon i a lustra riba sierto defisiensia den e desaroyo sosial di vários grupo di enfoke den nos komunidat.

Sin mas e palabranan profundo di pastor Curtis a konmové i alimentá e espíritu di esnan presente.

Despues e programa a sigui ku un akto den kua a onra sra.Idis Doran-Wallé, pa su tantísmo añanan realisando trabou komo voluntario, hopi valioso pa nos komunidat.

Sra.Doran-Wallé a risibí un plaka di mérito, kreá pa e kompania lokal, Fantasy Arts.

E kompania lokal aki alabes a krea obranan di arte ku a duna e diferente organisashonnan presente, afiliá na WSCC, komo rekuerdo di e fecha i enkuentro memorabel.

Pa klousurá e enkuentro, sra.Mirieta-de Lanoy, tambe a hiba un diskurso korto, pero profundo, den kua el a kompartí diferente punto ku meresé mas atenshon i akshon na bienestar di nos komunidat.

Tambe el duna variós punto pa pensa ariba, a gradisí e damanan pionero di WSCC i a mustra riba e echo ku ta trahando huntu por logra un komunidat mas resiliente i un mihó Kòrsou pa un i tur.