Minister Charles Cooper ta bishitá Intertraffic RAI Amsterdam

Willemstad – Minister Charles Cooper a hasi un bishita di trabou resientemente na feria internashonal Intertraffic Amsterdam, ku a tuma lugá na RAI Amsterdam. E feria akí ta rekonosé mundialmente komo e plataforma mas importante pa profesonalnan den sektor di mobilidat i tráfiko.

Intertraffic ta reuní gobièrnu, empresanan i institushonnan di konosementu, i ta ofresé un bista kompleto di e último produktonan, servisionan i solushonnan inovativo pa loke ta mobilidat inteligente, sigur i sostenibel. Ku mas di 900 ekspositor, mas di 30.000 profesonal for di mas ku 145 pais, i 100 seshon di konosementu, e evento ta forma un punto di enkuentro importante pa esnan ku ta tuma desishon i ekspertonan.

Durante e bishita, minister Cooper a profundisá den desaroyonan aktual i inovashonnan relevante pa Kòrsou.

Temanan manera sistema di tráfiko inteligente, infrastruktura resistente na klima, seguridat di tráfiko, i solushonnan di mobilidat di futuro tabata sentral. E konosementu i kontaktonan internashonal ku Minister a desaroyá ta kontribuí na fortalesé maneho di mobilidat i desaroyo di infrastruktura riba e isla.

Minister Cooper a enfatisá e importansia di kolaborashon internashonal i interkambio di konosementu:

“Dor di partisipá den plataforma manera Intertraffic nos ta keda aktualisá ku e último desaroyonan i nos por apliká solushonnan inovativo den e konteksto lokal di Kòrsou. Esaki ta yuda nos traha pa un sistema di mobilidat mas sigur, sostenibel i prepará pa futuro.”

Ministerio di Tráfiko, Transporte i Planifikashon Urbano ta keda komprometé pa, basá riba mihó práktikanan internashonal, sigui mehorá infrastruktura i mobilidat na Kòrsou.