Minister di Hustisia ta inisiá proseso pa formalisá ORV
Hustisia
Minister di Hustisia ta inisiá proseso pa formalisá ORV
Publiká riba 18 Mart 2026
Willemstad – Minister di Hustisia a tene un reunion importante ku diferente aktornan pa trata e mandato i futuro di ORV (Opleidingsinstituut Rechtshandhaving & Veiligheid). Durante e reunion, minister a indiká ku desde 10 di òktober 2010 no a logra regla tur kos relashoná ku e instituto.
Segun minister Hato, te na e momentu aki no tin un inrichtingsplan formal pa ORV. P’esei, Gobièrnu kier usa e periodo aki pa formalisá i fortalesé e instituto. Den diferente seshon di reunion, ku entre otro tim di maneho di ORV a trese vários idea pa mehora e organisashon.
Metanan pa fortalesé ORV
Gobièrnu a definí algun meta konkreto pa logra un base sólido pa ORV. Entre otro, ta trata di:
- Desaroyo di un inrichtingsplan pa definí struktura i organisashon di ORV.
- Preparashon di un functiehuis (struktura di funshonnan). Deloitte tin enkargo pa traha riba e tema aki pa henter Gobièrnu, i esaki ta un bon oportunidat pa inkluí ORV den e proseso.
- Desaroyo di un plan di komunikashon.
- Preparashon di un Statuto Sosial i un base hurídiko, tur dos pa wòrdu formalisá via Besluit di Overheid (BO).
Vishon pa futuro
Vishon di minister Hato ta pa ORV bira un instituto sentral pa formashon den e kadena hudisial di Kòrsou. Segun minister, paisnan manera Aruba i St. Maarten ta mira Kòrsou ku interes, pasobra nan mes no tin un instituto di entrenamentu manera ORV. Durante e reunion a diskutí tambe e partisipashon di diferente servisio uniformá. Minister Shalten Hato a indiká ku e vishon ta pa ORV sirbi komo instituto di formashon pa diferente organisashon den sektor di lei i seguridat. Histórikamente ORV tabata un skol di polis, pero e meta awor ta pa e bira un instituto pa mas organismo.
Formashon i desaroyo di personal den kadena hudisial
Un di e ideanan ku a sali dilanti ta pa evaluá e posibilidat di un basisopleiding komun, despues di kua personal por sigui ku módulo di spesialisashon. Na mes momentu a enfatisá ku mester tene kuenta ku diferente nivel di entrada i trayekto di karera.
Próksimo paso
Deloitte a keda enkargá pa traha riba e vishon, mishon i strategia, i tambe riba e formashon di organisashon i deskripshon di funshonnan. Lo forma werkgroepnan ku representantenan di e diferente organisashon pa traha riba e plan. Minister a enfatisá ku komunikashon ku personal i sindikatonan ta importante pa por duna splikashon ku e proseso no ta un reorganisashon, sino un paso pa fortalesé ORV. Ministerio di Hustisia lo pone tur dokumentonan relevante na disposishon di Deloitte pa asina e trabou por kuminsá sin retraso. Ku esaki, minister a duna lus bèrdè pa inisiá ku e proseso pa fortalesé ORV komo instituto di entrenamentu pa e sektor di lei i seguridat na Kòrsou.
[FIN DI KOMUNIKADO]
639114718427035"
639114718427035"