Modernisashon di e maneho di atmishon di Kòrsou entrante 1 di aprel 2026

WILLEMSTAD – Gobièrnu di Kòrsou ta anunsiá un modernisashon importante di e maneho di atmishon. Entrante 1 di aprel 2026, lo tin un kambio di maneho ku ta enfoká riba fortalesé un sistema di migrashon mas efisiente, transparente i prepará pa futuro.

Un maneho di atmishon ku ta funshoná bon ta un parti esensial di un maneho di migrashon responsabel. Den e kaso aki, e ta eksigí pa reglanan kla, un ehekushon práktiko i un balansa ku ta tene kuenta ku tantu interes di nos pais komo esun di esnan ku ta apliká. Ku introdukshon di e kambio aki, Kòrsou ta duna un siguiente paso den profeshonalisashon di su sistema di migrashon.

Mas fleksibilidat i ménos karga atministrativo

Un di e kambionan mas importante ta ku, dependiente di e propósito di estadia, aplikantenan lo por pidi un pèrmit di estadia temporal pa un periodo máksimo di tres aña. E ampliashon aki ta trese mas stabilidat i seguridat hurídiko pa esnan ku ke biba i traha legalmente na Kòrsou. Mesora, esaki ta redusí e karga atministrativo konsiderablemente, pasobra lo tin ménos nesesidat pa hasi prolongashon di pèrmit ku frekuensia haltu.

Minister di Hustisia, Shalten Hato, a mustra e importansia di e paso aki:
“Ku e modernisashon aki nos ta hasi nos maneho di atmishon no solamente mas efisiente, pero tambe mas hustu i predesibel. Nos ta duna hende ku ke kontribuí di forma legal na nos sosiedat mas klaridat i stabilidat, miéntras nos ta mehorá e ehekushon pa nos instansianan.”

Enfoke riba aplikashonnan kompleto i korekto

Ademas di e ampliashon aki, lo tin un enfoke mas fuerte riba e kalidat di e aplikashonnan ku ta wòrdu entregá. E maneho nobo ta inkluí rekisitonan mínimo kla ku kada aplikashon mester kumpli ku nan, manera:

• un dokumento di biahe bálido;
• un formulario kompletamente i korektamente yená;
• i pago oportuno di e leges korespondiente.

Na momentu ku e dokumentonan aki ta korekto, Servisio di Atmishon lo por prosesá aplikashonnan mas lihé i efisiente, loke lo kontribuí na tempu di proseso mas kòrtiku i mas transparensia.

Minister Hato a agregá:
“Un sistema efisiente ta kuminsá ku aplikashonnan kompletu i korekto. Dor di pone kondishonnan kla, nos por tuma desishon mas lihé i duna un mihó servisio na tur esnan ku ta dependé di e proseso aki.”

Renobashon di maneho basá riba eksperensia práktiko

E kambio di maneho aki ta sustituí e maneho di atmishon for di 2019 i a ser kambia despues ku riba base regular di monitoreo kontinuo, evaluashon i eksperensianan den práktika, a mustra kla unda tabatin nesesidat pa mehorashon.

Ku e modernisashon aki, e meta ta pa realisá un sistema di atmishon ku:

• ta ofresé seguridat hurídiko;
• ta atministrativamente mihó;
• i ta konforme ku desaroyo sosial i ekonómiko aktual di Kòrsou.

Balansa entre desaroyo i mantenshon di lei

Maneho di migrashon ta eksigui semper un balansa entre fasilitá migrashon legal i protehá e órden públiko. Kòrsou ta sigui komprometé na un maneho kaminda tin espasio pa desaroyo ekonómiko i mobilidat internashonal, sin pèrdè di bista reglanan kla i ehekushon efektivo.

Minister Hato a enfatisá:
“Maneho di migrashon ta trata di balansa. Ku e paso aki nos ta sigurá reglanan kla, un ehekushon mas fuerte i un sistema ku ta krese huntu ku nos pais. Asina nos ta fortalesé tantu nos ekonomia komo e seguridat hurídiko.”