9 Parkeercontroleurs di Securitas a risibí nan diploma di BAVPOL

WILLEMSTAD – Djaweps 19 di mart 2026, nuebe parkeercontroleurs di Securitas a risibí nan diploma despues di a kompletá ku éksito e formashon di BAVPOL na ORV. 

Dia 6 di mei 2025, e klas di BAVPOL 2025-I/Parkeercontroleurs a kuminsá nan estudio na ORV. E 9 graduadonan a sigui un trayekto di estudio intensivo, den kua nan a logra kombiná nan responsabilidatnan laboral i personal parti mainta, ku nan formashon profeshonal parti atardi. 

E seremonia di entrega di diploma a tuma lugá na Securitas i a konta ku presensia di Direktora di ORV, Sra. Alpha Falbru, Direktornan di Securitas, Sr. Paul de Kloet i Sr. Jeroen Kibbelaar, Sr. Mahesh Mukhi di Stichting Willemstad Parkeerbeheer, Mènedjer di Sektor pa Estudionan Postinisial, Sr. Jowenny Troeman, entre otro invitadonan. E seremonia a wòrdu moderá dor di Mènedjer di Komunikashon na ORV, Sr. Ronald Richardson. 

Durante aktividat, diferente oradó a dirigí palabranan di felisitashon na e graduadonan, enfatisando e importansia di dedikashon, disiplina i motivashon komo faktornan klave den e logro di e grupo. Direktora di ORV, Sra. Falbru, a dirigí su mes na e graduadonan bisando:
“Nos por bisa ku bosnan tabata studiantenan ehemplar! Boso komportashon, motivashon i resultadonan despues di kada periodo di èksamen tabata realmente eksepshonal! Sigui invertí den boso mes, sigui krese i nunka stòp di invertí den boso edukashon.” 

Tambe a duna rekonosementu durante e seremonia na e top tres graduadonan di e klas di BAVPOL 2025-I/Parkeercontroleurs: Sr. Eldrick Foendoe, Sr. Bruno Knol i Sra. Marilène Nicolina, kende a distinguí nan mes pa nan resultado sobresaliente. 

Konforme e Parkeermeterverordening di Kòrsou di 2012, e 9 parkeercontroleurs di Securitas awor por kontribuí na mantenshon di òrdu, kontrol i seguridat den nan aria di trabou komo Buitengewoon Agent van Politie.  

E seremonia a terminá den un ambiente plasentero, kaminda tur presente por a felisitá e 9 graduadonan i tambe sosialisá durante e enkuentro. Gerensia di ORV i Securitas ta orguyoso di e logro akí i ta felisitá tur graduadonan un biaha mas.