Promé Minister Pisas ta reuní ku VBC riba desaroyonan energétiko i ekonómiko
Asuntunan General i Promé Minister
Promé Minister Pisas ta reuní ku VBC riba desaroyonan energétiko i ekonómiko
Publiká riba 24 Mart 2026
Willemstad, Djaluna 23 di mart 2026, Promé Minister Gilmar Pisas a tene un enkuentro ku representantenan di Vereniging Bedrijfsleven Curaçao (VBC) tokante desaroyonan resiente riba merkado energétiko internashonal i e posibel efektonan pa nos pais. Durante e reunion, VBC a ekspresá nan preokupashon riba e tema aki i a mustra nan disposishon pa kontribuí aktivamente na bini ku akshonnan pa mitigá e situashon.
Promé Minister Pisas a apresiá e aktitut konstruktivo di VBC i a invitá e organisashon pa sigui partisipá na e reunionnan multidisiplinario den futuro tokante e tema aki, pa Gobièrnu tambe por hasi uso di nan eksperensia i ekspertisio. E siguiente reunion multidisiplinario ku e diferente stakeholdernan lo tuma lugá djabièrnè awor 27 di mart.
E enkuentro a tuma lugá den un ambiente ameno i respetuoso, ku enfoke riba diálogo, kolaborashon i responsabilidat kompartí pa bienestar i stabilidat di Kòrsou.
